Бу ый саҥата «Колымский экспресс» диэн дьоһун суолталаах бырайыагы үөрүүлээх быһыыга-майгыга Магадан уобалаһыгар туттардыбыт. Онон «Халыма» суолун бата олорор илин эҥэр, Томпо, Өймөкөөн улуустарын нэһилиэктэрэ «оптикаҕа» холбоннулар.
Анивера АКИМОВА, «Саха сирэ» хаһыат, edersaas.ru
Ол эрээри диирбитигэр тиийэбит. Сибээс утаҕын тутааччылара ыксаабыттара эбитэ дуу, сорох сиринэн оптика утахтара сиргэ таах мээнэ «тэлгэнэ» сыталлар үһү. Ол иһин кэлбит-барбыт киһи эрэ барыта тоҕо көтөн ааһар үһү. Кырдьык, сибээс ситимин хас да сиринэн тоҕо тардан, интэриниэт сүтэ сылдьыбыттаах. Аны, бу күннэргэ, батсаапка биир видео тарҕанна. Онно сибээс утаҕын сууллаары турар синньигэс маска иилбиттэрэ көстөр. Тыал түстэ да, бу сууллан түһүөх курдук.
Тугун-ханныгын чопчулаһаары, оптика ситимин туппут «ЭкспертГрупп» ХЭТ тахса сырыттыбыт. Онуоха, тэрилтэ пресс-сэкиритээрэ Светлана Львова:
— Биһиги тэрилтэбит 2015 сылтан саҕалаан, өрөспүүбүлүкэ илин энэр улуустарыгар оптиковолоконнай сибээс магистралын тутуутунан дьарыктанар. Аан бастакы эбийиэкпитин Майаттан саҕалаан Аммаҕа диэри 150 килэмиэтир кэриҥэ усталаах ситими туппуппут. Итини биһиги нууччалыы эттэххэ, «навесной» ньыманан, ол эбэтэр сибээс тирэх мастарыгар (опораларга) кабель иилэн ыыппыппыт. Онтон сүрүн магистраль аныгы технология ирдэбилинэн сир аннынан барыахтаах. Оччоҕуна эрэ сибээс ситимэ быстыбат, итиэннэ көтөр-сүүрэр алдьаппат. Сир аннынан барар кабель сыаната ыарахан. Онон бастакы ситиммитин тутан баран, аны маннык ньыманан сүрүн утаҕы оҥорон саҕалаабыппыт. Билигин сир аннынан барар магистраль Алтаҥҥа тиийэн турар. Сыл бүтүүтэ Аммаҕа тиийэрэ күүтүллэр. Ол курдук, 2018 сылга Аммаҕа ыытыллыахтаах VII-с спортивнай оонньууларга стадиоҥҥа уонна күрэхтэһии буолар эбийиэктэригэр канал биэриэхтээхпит. Онон спартакиада арыллыытын, сабыллыытын уонна да атын чаҕылхай түгэннэрин өрөспүүбүлүкэ бары олохтоохторо интэриниэт нөҥүө онлайн режиминэн көрүөхтэрэ диэн эрэннэрэбит.
Оттон ити батсаапка күүлэйдии сылдьар видео туһунан эттэххэ, баһаалыста, биһиги үлэбитин уонна ыаллыы сытар улуус олохтоохторун убаастааҥ, сыаналааҥ, соруйан алдьатымаҥ диэн көрдөһөбүт. Суотабай, интэриниэт сибээһэ итинэн барарын өйдөөҥ! Күлүү-элэк оҥостумаҥ! Сайдыы күн-түүн бара турар, үлэбит тохтообот. 2018 сылга ити трасса устун баар көстөн турар ситимнэр үгүстэрэ көтүрүллүөхтээхтэр. Түгэнинэн туһанан, өрөспүүбүлүкэ олохтоохторун сааскы бырааһынньыктарынан эҕэрдэлиибит!, — диэн быһааран биэрдэ.
Анивера АКИМОВА, «Саха сирэ» хаһыат, edersaas.ru