Саҥа дьыл бырааһынньыгар киһи барыта ураты, сонун бэлэҕи кэтэһэр үгэстээх. Ол эрээри саҥа сокуоннар, уларытыылар киирэннэр, бэйэбит да билбэппитинэн олус «сыаналаах» бэлэҕи тутан соһуйабыт. Урукку өттүгэр коммунальнай өҥө тарыыптара тохсунньу 1 күнүттэн үрдүүр эбит буоллахтарына, билигин үрдээһин сылга биирдэ от ыйыттан оҥоһуллар. Онтон бензин, уматык сыаната, биэнсийэ кээмэйэ сыл саҕаланыыта уларыйар.
Оптуобус бырайыаһа – 30 солкуобай
Дьокуускай куорат баһылыга Айсен Николаев суруналыыстары кытары көрсүһүүгэ, тохсунньу ортотуттан Дьокуускайга оптуобус төлөбүрэ үрдүөхтээҕин туһунан иһитиннэрбитэ. Үрдээһин утарытынан (наличный расчет) төлөбүргэ оҥоһуллуохтаах. Барыллааһын быһыытынан, 30 солкуобайга тэҥнэһиэхтээх. Оттон каартанан төлөбүргэ сыана уруккунан хаалыаҕа.
Бастакы оҕоҕо төлөбүр
2018 сыл тохсунньу 1 күнүттэн дьиэ кэргэҥҥэ бастакынан төрөөбүт оҕолорго ый аайы төлөбүр олохтонор буолуоҕун туһунан дойду бэрэсидьиэнэ Владимир Путин өссө былырыын эппитэ. Бу аадырыстаммыт көмө дьиэ кэргэн төһө дохуоттааҕыттан көрөн бэриллэр. Тиийинэн олоруу кээмэйинэн быһыллыахтаах. Төлөбүр оҕо балтараа сааһа туолуор диэри бэриллиэхтээх.
Бензин
2018 сылтан бэһис кылаастаах бензин уонна дизельнэй уматык акзиһа үрдээтэ. Инньэ гынан, бензин сыаната Араассыйаҕа ортотунан 60 харчынан эбиллиэн сөбүн экспертэр этэллэр. Дьиҥэр, билигин даҕаны бензин сыаната чэпчэкитэ суох.
Хамсаабат баай-дуол нолуога
Бу сыл күһүнүттэн хамсаабат баай-дуол нолуога улаатыахтаах. Маны таһынан сир нолуога 20% үрдүөҕэ. Бу үп-харчы олохтоох бүддьүөккэ киирэр.
Табахсыттар ороскуоттара элбиэ
Табаах акзиһа улаатан, биир тыһыынча сигарета акциһын ставката 1718 солк. тэҥнэһиэҕэ. Онон биир паачка сигарета ортотунан 3-5 солк. үрдүөхтээх.
Страховка
Быйылгыттан килийиэн наадата суох страховкатыттан 15 күн иһигэр аккаастаныан сөп. Урут бу болдьох 5 оробуочай күнүнэн ааҕыллара.
Анивера АКИМОВА, «Саха сирэ» хаһыат, edersaas.ru