Чэпчэтиинэн туһанар дьон оптуобуска айаннарыгар кэккэ уларыйыылар киирдилэр. Билигин да ол уларыйыылары билбэт-көрбөт, оптуобус иһигэр кондукторга быһаартара сатыыр, каартата «үлэлээбэт» буолан, уу харчынан төлүүргэ күһэллэр дьон аҕыйаҕа суох. Оптуобус төлөбүрүгэр киирбит уларыйыылар тустарынан СӨ Үлэҕэ уонна социальнай сайдыыга министиэристибэтин исписэлиистэрэ маннык быһаардылар.
2016 сыл сэтинньи 1 күнүттэн Дьокуускай куоракка итинник социальнай билиэттэри (ЕСПБ) туһаныы тохтоото. Ол оннугар сэтинньи 1 күнүттэн чэпчэтиинэн туһанар куорат олохтоохторо тырааныспар-сыһыарыылаах социальнай каартанан туһаналлар. Дьокуускай куорат нэһилиэнньэни социальнай көмүскээһиҥҥэ уонна үлэҕэ управлениета «Алмаасэргиэнбааны» кытары тырааныспар-сыһыарыылаах социальнай каарталары оҥороттордо.
Урут социальнай билиэттээх (ЕСПБ) буоллаҕына, тырааныспар-сыһыарыылаах быстах кэмнээх социальнай каартаҕа уларытыан сөп. Дьокуускайга Ленин уул. 7 дьиэтигэр уопсастыбаннай тырааныспар сулууспатын киин пуунугар кэлэр. Урут социальнай билиэтэ суох буоллаҕына, Ленина пр. 4/1 аадырыска Дьокуускай к. нэһилиэнньэни социальнай көмүскээһиҥҥэ уонна үлэҕэ управлениетыгар быстах кэмнээх каартаны ылар быраабын бигэргэтэр ыспыраапканы кэлэн ылыахтаах. Онуоха кини пааспарын, СНИЛС, чэпчэтиинэн туһанарын туһунан дастабырыанньатын (инбэлиитин туһунан ыспыраапка, Аҕа дойду Улуу сэриитин, байыаннай дьайыылар, үлэ бэтэрээнэ уо.д.а.) аҕалыахтаах. Социальнай каартаны «Алмаасэргиэнбааҥҥа» оҥорон биэрэллэр. Аадырыстара: Дзержинскэй уул. 226/4; Киров уул. 28/1; Ленина пр. 10, 22, Ойуунускай уул. 11/1.
Надежда ЕГОРОВА