Орегон штат — Дьокуускай куорат: эдэрдэр матчевай көрсүһүүлэрэ

Ааптар: 
Бөлөххө киир:

Атырдьах ыйын 1 күнүгэр Дьокуускайга “Триумф” спорт киинигэр киэһэ 18-00 чаастан Дьокуускай куорат уонна АХШ Орегон штатын обургу уолаттарга көҥүл тустууга сүүмэрдэммит хамаандаларын матчевай көрсүһүүлэрэ буолар. Онон тустууну сэҥээрээччилэр саха уонна АХШ тустууга оскуолаларын иитиллээччилэрин сытыы хапсыһыыларын көрөөрү амтаһыйа сылдьаллар.

 Бу 2011 сыллаахха АХШ бочуоттаах тириэньэрэ, PacificUniversity математикаҕа профессора, устудьуон тустуутун үтүөлээх тириэньэрэ, аата Тустуу Албан аатын саалатыгар үйэтитиллибит Майк Клок көҕүлээһининэн Саха Өрөспүүбүлүкэтин уонна АХШ Орегон штатын икки ардыларыгар олохтоммут «Sakha-USAWrestlingExchang» бырайыак чэрчитинэн ыытыллар күрэхтэһии өрөспүүбүлүкэ спортивнай олоҕор биир ураты тэрээһининэн буолуоҕа диэн киин куорат дьаһалтатын пресс-сулууспата иһитиннэрэр.

Америка Холбоһуктаах Штаттарын курдук ыраах сиртэн аат ааттаан кэлэр Орегон сүүмэрдэммит хамаандатын бөҕөстөрө “Триумф” көбүөрүгэр кыайыы эрэ иһин киирсэргэ ох курдук оҥостон тахсыахтара. Дьэ, кинилэр кимнээх эбиттэрий, билсиһиэҕиҥ:

Майк Саймонс – хамаанда салайааччыта, Орегон штат тас дойдулары кытта сыһыаҥҥа бырагырааматын дириэктэрэ;

Кайл Темпл – тириэньэр, штат обургу уолаттарга сүүмэрдэммит хамаандатын салайааччы;

Дерик Кер – 46 киилэҕэ диэри ыйааһыҥҥа штат чөмпүйүөнэ, призера;

Райан Зеллер – Орегон классическай тустууга чөмпүйүөнэ, көҥүл тустууга үрүҥ көмүс призера, 52 киилэҕэ АХШ боруонса призера;

Рикки Хаф –  штат 55 киилэҕэ үрүҥ көмүс призера;

Гэвен Холли – Орегон классическай уонна көҥүл тустууга призера, 60 киилэҕэ классическай тустууга АХШ боруонса призера;

Ноа Уотчсмуз – 64 киилэҕэ уолаттар ортолоругар көҥүл тустууга АХШ чөмпүйүөнэ;

Сойер Майерс –фолк-стайл диэн устудьуоннар тустууларыгар 70 киилэҕэ Орегоҥҥа алтыс миэстэлээх;

Логан Миик –74 киилэҕэ классическай уонна көҥүл тустууга Орегон чөмпүйүөнэ;

Лэйтен Бригс – 78 киилэҕэ көҥүл тустууга штакка бэһис миэстэлээх;

Брюс Колтер – 85 киилэҕэ көҥүл тустууга Орегоҥҥа иккис, “классикаҕа” төрдүс миэстэлэрдээх.

Эйвери Джарамилло – классическай уонна көҥүл тустууга 90 киилэҕэ штат чөмпүйүөнэ;

Бо Кроуфорд – көҥүл тустууга 100 киилэҕэ штат үрүҥ көмүс призера;

Адам Лэмб – көҥүл тустууга 122 киилэҕэ штакка төрдүс миэстэлээх.

АХШ Орегон штатын сүүмэрдэммит хамаандата атырдьах ыйын 1 күнүгэр Дьокуускайга, 5 чыыһылаҕа — Аллараа Бэстээххэ, 6 чыыһылаҕа — Аммаҕа матчевай көрсүһүүлэргэ кыттыаҕа.

Америка Холбоһуктаах Штаттарыгар Оклахоманы, Айованы, Нью-Йорку, Пенсильванияны, Калифорнияны кытары Орегон тустуу биир күүскэ сайдыбыт штатынан биллэр. Манна көҥүл тустууну сэргэ классическай уонна фолк-стайл тустуунан 20 тыһыынчаттан тахса оҕо дьарыктанар.

Онон тэрийээччилэр киин куорат олохтоохторун уонна ыалдьыттарын атырдьах ыйын 1 күнүгэр, оптуорунньукка, “Триумф” спорт киинигэр АХШ Орегон штатын уонна Дьокуускай куорат уолаттарга көҥүл тустууга хамаандаларын матчевай көрсүһүүлэрин кэлэн көрөллөрүгэр ыҥыраллар, интэриэһинэй хапсыһыылар буолуохтара диэн эрэннэрэллэр. Киириитэ – босхо.

Роман Попов, “Саха сирэ” хаһыат

+1
0
+1
0
+1
0
+1
0
+1
0
+1
0
+1
0