Бу сайын Дьокуускайга “Орел и решка” диэн биллэр биэриини устааччылар кэлиэхтэрэ. Биэриини Украина “Пятница” ханаала бэлэмниир. Саха сирин олохтоохторо бу биэриини кабельнай ханаалынан умсугуйан көрөр буолуохтаахтар.
Бу айанньыттарга олус интэриэһинэй биэрии. Араас дойдулары кэрийэ сылдьан усталлар. Бастаан манньыаты быраҕан, ким баай, ким дьадаҥы буоларын быһаараллар. Биир ыытааччы 100 долларга икки күн устата олоруохтаах, иккис ыытааччы “кыһыл көмүс карталаах” буолан, төһө баҕарар туттуон сөп. Сорох дойдуларга 40 тыһыынча доллары туттубут түгэннээхтэр. Онон дьадаҥы уонна баай киһи бу дойдуга хайдах сынньаналларын, аһыылларын, хоноллорун, аралдьыйалларын көрдөрөллөр. Киһи олус элбэххэ үөрэнэр.
Бу сайын атын дойдуларга буолбакка, Арассыыйа уон куоратыгар сылдьыахтаахтар. Онно бу кыһын куоластааһыны биллэрбиттэрэ. Дьокуускай 3000-тан тахса куолаһы ылан, уон иһигэр киирбитэ. Бу сырыыга Жанна Бадоева диэн бастакы ыытааччылартан биирдэстэрэ кэлиэхтээх. Ол туһунан кини «Телепрограмма» сурунаалга интервьютугар кэпсээбит.
Сайыны быһа Калининград, Казань, Минеральные Воды, Владивосток, Краснодар, Красноярскай куораттары устан бэлэмниэхтээхтэр. Бадоева этэринэн, атын куораттары устубуттар, Красноярскай уонна Дьокуускай эрэ хаалбыттар. Онон сотору кэминэн кэлэллэрэ буолуо.
Дьэ, интэриэһинэй, Саха сиригэр ханна-ханна сылдьаллара буолла? Өлүөнэ очуостарыгар, эбэтэр Булууска тиийэллэрэ эрэбил. Дьиҥэ, баай ыытааччы сөмөлүөтүнэн ханна баҕарар тиийиэн сөп. Аны туран, сылдьыбыт сирдэригэр ыытааччылар 100 доллары бытыылкаҕа уган кистиир идэлээхтэр. Онон, биэриини көрөөт да, дьон ол кылааты көрдүү ыстанар буолуохтаах.
Ханныгын да иһин, “Орел и Решка” биэрии биһиги Дьокуускайбытыгар сэргэхсийиини таһаарара саарбаҕа суох. Онтон күһүөрү биэриини көрөр өссө интэриэһинэй буолуоҕа.
Ангелина ВАСИЛЬЕВА, “Саха сирэ” хаһыат, edersaas.ru
Манна даҕатан эттэххэ
Икки сыллааҕыта «Пятница» ханаал «Хэлоу, Раша» биэриитин устар бөлөҕө Дьокуускайга кэлэ сылдьыбыта. Уратыта диэн, ыытааччылара — нууччалыы саҥарар омук дьоно. Бырдахтан улаханнык саллан барбыт сурахтаахтара.
