Тохсунньу 9 күнүгэр сокуоннай саастарын ситэ илик оҕолор социальнай-реабилитационнай кииннэригэр сыл аайы ыытыллар Ороһуоспа бырааһынньыга буолла.
Бырааһынньыкка Архиепископ Якутскай, Ленскай Роман Епархия бэрэстэбиитэллэрин кытары уонна социальнай бииргэ үлэлэһэр «Donna S» маҕаһыыннар ситимнэрин генеральнай дириэктэрэ Светлана Руфова ыалдьыттаатылар.
Ыалдьыттар молебен ааҕыытын кэнниттэн оҕолорго баҕа санааларын тириэртилэр. Киин исписэлиистэригэр махтаннылар. Оҕолорго сонун бэлэхтэри, сылаас таҥастары аҕалан үөртүлэр.
Светлана Николаевна оҕолору Саҥа дьыл бырааһынньыктарынан эҕэрдэлээн туран, караокелаах муусука тэрилин, телевизоры уонна DVD-караокены бэлэхтээтэ. Бу барыта Саҥа дьыл иннинэ аһыллыбыт музыкальнай хосторугар наада буолуоҕа.
Онтон киин иитиллээччилэрэ ыалдьыттарга уонна биир саастыылаахтарыгар анаан ырыа-тойук эгэлгэтин толордулар, хоһоон аахтылар, сценка туруордулар. Күндү ыалдьыттарыгар өйдөбүнньүк бэлэҕи – бэйэлэрэ оҥорбут аанньалларын туттардылар.
Бу күн хас биирдии оҕо ыра санаата туоларыгар баҕара хаалла.
Надежда ЕГОРОВА, «Саха сирэ» хаһыат, edersaas.ru