Ватсап суруйааччыта Родион Лазерович Данилов-Ородьумаан бу сылга утуу-субуу тахсыбыт “Дьээбэ-хообо, көрүдьүөстэр”, “Былыргы уонна быйылгы” кинигэлэрин сүрэхтэниитэ буолан ааста.
Куйаар ситимин үйэтэ диэх курдук. Дьон биллэриини ааҕан, хото кэлбит. Бэйэтэ да аҕыйах ахсаанынан тахсыбыт кинигэлэрэ көрүөх бэтэрээ өттүгэр бараннылар. Били, “итии бэрэски курдук” диэн итини этэн эрдэхтэрэ.
Тэрээһини суруналыыс, суруйааччы Валерий Васильев-Муттуххай Бороҥ уонна суруйааччы Валерий Никифоров-Суор Уола иилээн-саҕалаан ыыттылар. Көрсүһүүгэ Ородьумаан суруйууларын интэриэһиргиир дьон, “Айар кут” бөлөх суруйааччылара, биир дойдулаахтара кытыннылар.
Бэлиэтээн эттэххэ, Родион Лазеревич айар үлэнэн 2001 сылтан дьарыктанар. “Алтан сэргэ” (2004), “Олох араас эгэлгэтэ” (2015), “Дьээбэ-хообо, көрүдьүөстэр” (2016), “Былыргы уонна быйылгы” (2016) кинигэлэр ааптардара. Бэйэтэ туспа, ураты суоллаах-иистээх суруйааччы буолар.
Кинигэ сүрэхтэниитигэр мустубут дьон Ородьумаан айар үлэтигэр ситиһиини баҕардылар, үгүс үтүө тыллары эттилэр, суруйааччылар бэйэлэрин кинигэлэрин бэлэх ууннулар. Муттуххай Бороҥ Ил Түмэн наукаҕа, үөрэххэ, сонуну киэҥник тарҕатар средстволарга уонна уопсастыбаннай тэрилтэлэр дьыалаларыгар кэмитиэт аатыттан Ородьумааҥҥа грамотаны туттарда.
Р.Л.Даниловы-Ородьумааны кытта сиһилии сэһэргэһиини “Саха сирэ” хаһыакка уонна edersaas.ru сайтка ааҕаарыҥ.
Людмила ПОПОВА.