Ороссолуода уолчаана, үйэ аҥарын анараа өттүгэр ыраламмытым туолбутун көрөн, олус астынным.
Еdersaas.ru
Ыраах 1962 сыллаахха Мэҥэ Хаҥалас Ороссолуода начаалынай оскуолатын 4-с кылааһын үөрэнээччитэ Ваня Ксенофонтов «аны 20 сылынан Ороссолуодаҕа тимир суол кэлиэҕэ» диэн ыраланан сочинение суруйбута. Оччолорго Компартия уонна ССРС бырабыыталыстыбата аны 20 сылынан коммунизмҥа олоруохпут диэн норуокка сыал-сорук туруораллара. Онон туох-баар инники ситиһии, сайдыы 20 сылынан кээмэйдэнэрэ.
Бүгүн, балаҕан ыйын 2 күнүгэр, 55 сыл буолан баран, Ороссолуодам үрдүнэн ыстаал ыллыктарынан табаарынай састаап тилигирээн ааһарын түбэһэ түһэн биир дойдулаахпыныын, СӨ искусствотын үтүөлээх диэйэтэлэ, өрөспүүбүлүкэтээҕи Художественнай колледж дириэктэрэ Кирилл Петрович Гаврильевтыын, саха эстрадатын тахсан эрэр сулуһа Сахаминныын сөҕө, астына көрдүбүт. Хас биирдиитигэр 40 туонналаах иккилии контейнердаах 70 платформаны соспут поезд Аллараа Бэстээххэ ааста. Ол аата, ааҕан таһаардахха, 5.600 туонна таһаҕас биирдэ тиэллэн кэллэ. Тэҥниир буоллахха, уу суолунан биир танкер Тус Хоту 2000 т уматыгы илдьэр. Оччотугар бу биир састаап үс танкер уматыгы аҕалбытыгар тэҥнэһэр. Оччотооҕу оҕо үйэ аҥарын анараа өртүгэр ыраламмыта туолан, сайдыы суолугар үктэнии диэн бу буоллаҕа!
Бэйэлээтэр бэйэбит “Саха сирин тимир суола” хампаанньабыт атаҕар туран тигинэччи үлэлээн-хамсаан бардаҕына, инникитин олохпут таһыма биллэ үрдүө, тыын суолталаах сыана-төлөбүр кээмэйэ да намтыа турдаҕа!
ВИДЕО:
Иван КСЕНОФОНТОВ-Уйбаан Силиги, суруналыыс.
Видео: Кирилл ГАВРИЛЬЕВ, Ороссолуодаттан төрүттээх Дьокуускай олохтооҕо.
Эксперт санаата
Аржаков: «Таспыттара төрдүс сыла»
Николай Аржаков, СӨ Тырааныспарын уонна суол хаһаайыстыбатын министиэристибэтин тимир суол отделын салайааччы бу видеону маннык быһаарда:
— Аллараа Бэстээххэ диэри таһаҕаһы таһыы 2014 сылтан саҕаламмыта. Номнуо 2 мөлүйүөн туонна таһаҕас аҕалылынна. Быйыл сыл аҥарыгар 400 тыһ. т таһаҕас кэллэ. Сүрүннээн аһылык бородууктата уонна оттук-уматык матырыйаала таһыллар. Тимир суол билиҥҥитэ быстах режиминэн үлэлиир. Бары ирдэбиллэри, тургутууну ааһан, туруктаахтык, эрэллээхтик үлэлиир режимигэр киирдэҕинэ, пассажирдары (дьону) таһыы саҕаланыаҕа.