Орто үөрэхтэргэ туттарсар абитуриеннар ханнык идэлэри талаллар эбитий?
СӨ Үөрэҕин уонна наукатын пресс-сулууспата иһитиннэрэринэн, нэдиэлэ саҥатынааҕы туругунан, орто анал үөрэх тэрилтэлэригэр, барыта, 8137 сайабылыанньа киирбит. Итинтэн 7466-та – бүддьүөт миэстэтигэр.
Сахамедиа, edersaas.ru
“Адаптивнай физическэй култуура” диэн исписээлинэскэ биир миэстэҕэ номнуо 21 сайабылыанньа киирбит! “Графическай дизайнер” идэтигэр биир миэстэҕэ 5,55 киһи. Итиэннэ өрүү буоларын курдук, “массыынаны көрөр-истэр маастар”, “кыраан машиниһа”, “илии уонна механизированнай сыбаарка сыбаарсыга” идэлэри сэҥээрэллэр эбит.
Оттон үөрэх тэрилтэлэринэн ылан көрөр эбит буоллахха, муҥутуур элбэх сайабылыанньаны И.И.Фадеев аатынан Дьокуускайдааҕы үп-экэниэмикэ кэллиэһигэр, С.Ф.Гоголев аатынан Дьокуускайдааҕы педагогическай кэллиэскэ, Дьокуускайдааҕы медицинэ кэллиэһигэр, П.И.Романов аатынан Дьокуускайдааҕы художественнай училищеҕа биэрбиттэр.
Күнүскү үөрэххэ сайабылыанньалары атырдьах ыйын 10 күнүгэр диэри ылаллар. Миэстэ баар түгэнигэр, докумуоннары сэтинньи 25 күнүгэр диэри тутуохтарын сөп.
Мунаарар ыйытыыларгытыгар сиһилии хоруйдары 8-4112-50-60-44 төлөпүөнүнэн ылыаххытын сөп.
Орто анал үөрэхтэр киин тутар хамыыһыйалара от ыйын 25 күнүттэн Дьокуускайдааҕы потребительскай кооперация атыы-экэнэмиичэскэй кэллиэһин баазатыгар (Ленин проспегын 50 №-дээх дьиэтэ) үлэтин саҕалыаҕа.
“Саха сирэ” хаһыат, edersaas.ru
Хаартыска — интэриниэттэн.