Өрөспүүбүлүкэ соҕотох «Орто Дойду» зоопарката кыһыннары-сайыннары үлэлиир буолан, манна аһаҕас халлаан анныгар таба, тугут, овцебык, бөрө, кырса, саһыл уонна да атын кыыллар олороллор. Бу күннэртэн зоопарка кыһыҥҥы эрэсииминэн үлэлээн эрэр.
Билигин зоопаркаҕа 180 араас кыыл, көтөр-сүүрэр баар. Зоопаркаҕа сылга хас да уонунан тыһыынча киһи сылдьар. Өрөспүүбүлүкэ олохтоохторо «Орто Дойду» сылтан-сыл ахсын тупсан иһэрин көрө-билэ сылдьар буолуохтаахтар.
СӨ Айылҕа харыстабылын министиэристибэтин пресс-сулууспата иһитиннэрбитинэн, сэтинньи 1 күнүттэн зоопарка күн ахсын сарсыарда 10 чаастан саҕалаан киэһэ 17.30 чааска диэри үлэлиэҕэ. Хаасса 16.30 чааска сабыллар. Онон, кыһыҥҥы тымныыттан чаҕыйбат дьон, ыраас чэбдик салгынынан тыына таарыйа «Орто Дойду» «олохтоохторун» кытары билсиҥ!
Анивера Акимова, «Саха сирэ» хаһыат, edersaas.ru