Бу күннэргэ «ОДьКХ» ГУП генеральнай дириэктэрин солбуйааччы, Ил Түмэн дьокутаата Юрий Садовников Үөһээ Халыма улууһугар тиийэ сылдьан, киинтэн саамай ыраах сытар Уһун Күөл сэлиэнньэтин олохтоохторун кытта көрүстэ.
Юрий Садовников бастаан утаа итиинэн хааччыйар эбийиэктэргэ сылдьан, саҥа хочуолунай үлэтин билистэ. Нэһилиэнньэни кытта мунньахха олохтоохтор, чуолаан, улууска коммунальнай хаһаайыстыба, авиация, үөрэх, медицина боппуруостарыгар туох үлэ ыытылларын ыйыталастылар. Биир сүрүн боппуруоһу, киин ититэр ситимҥэ холбоно илик чааһынай дьиэлэри холбооһун хаһан саҕаланарын ыйыттылар. Бу ыраах сытар хоту улуус нэһилиэгэр биир тыын суолталаах боппуруос буолар.
Юрий Садовников улуус дьаһалтатын кытта ити боппуруоһу быһаарыста. 6,96 МВт кыамталаах хочуолунайы «ОДьКХ» ГУП сакааһынан «СахаЭнергоЭффект» ХЭУо туппут. Бүгүҥҥү туругунан, 100 куб м кээмэйдээх резервуар, 250 кыамталаах дизельнэй станция уонна 1,74 МВт кыамталаах түөрт хочуол туруоруллубут. Итини тэҥэ, 350 м уһуннаах ититэр ситим эбии тардыллыбыт. Дьиҥэр, хочуолунай билигин этэҥҥэ үлэлии турар. 2018 сылга сайын өрөмүөн кэмигэр ититэр ситимҥэ саҥа холбонуон баҕалаахтарга анаан эбии 170-тан тахса м уһуннаах киин ититэр ситими тардыахтара.
Александр ТАРАСОВ, «Саха сирэ» хаһыат, https://edersaas.ru