«Мисс Виртуальная Якутия-2015″ кэрэ кыргыттар куонкурустарыгар саха кыыһыгар барсыбат дьүһүннээх баттахтаах (блондинка) Ирина Семенова кыайан, кыра айдааны таһаара сылдьыбыта. Иринаҕа бириис быһыытынан бэдэр саҕынньаҕы уонна биир сыллаах хантараактаах үлэни бэлэхтээбиттэрэ. Ону кыыспыт ханнык даҕаны биллэр фирманы кытта хантараак баттаспатах, мадьыал биисинэһигэр киирбэтэх, тута Санкт-Петребург куоракка көһөн барбыт. https://edersaas.ru
Куонкурус буолбута икки сыл ааспытын кэнниттэн Ириналыын интэриниэт нөҥүө кэпсэттибит:
— Билигин мин Санкт-Петербург куорат “Crop” диэн биир саамай бастыҥ салонугар парикмахерынан үлэлиибин. Үлэбин наһаа сөбүлээтим уонна өссө таһыммын үрдэтээри, эбии үөрэнэбин. Норуоттар икки ардыларынааҕы парикмахердар куонкурустарыгар кыттаары бэлэмнэнэбин, үлэлэрбин сахам норуотугар анаары оҥосто сылдьабын.
— Мисс буолбутуҥ кэнниттэн олоҕуҥ төһө уларыйда?
— Кырдьык, “Мисс Виртуальная Якутия” куонкурус олохпор биир умнуллубат кэм буолар. Ол эрээри, мин дьылҕабар дуу, олохпор дуу улахан оруолу оонньоото диир кыаҕым суох. Санкт-Петербурга олоро барыам диэн куонкурус иннинэ быһаарыммытым.
— Баттаҕыҥ дьүһүнүн, бүрүчүөскэҕин уларыта сылдьар эбиккин. Титуллаах мисскэ маннык быһыы-майгы барсар дии саныыгын дуо?
— Мин санаабыппын олоххо барытын киллэрэрбин сөбүлүүбүн. Дьон саҥатыттан, санаатыттан иҥнэн биир сиргэ олорору акаарылыы быһыы дии саныыбын.
— Мисс буолбуккар, бириис быһыытынан “ЭПЛ Даймоннары” кытта биир сыллаах хантараак баттаһар диэн сурах баара. Ол эрээри, эйигин биир даҕаны рекламаҕа хаартыскаҕа түспүккүн, уһуллубуккун көрбөтүбүт. Хайаспыккытый?
— Суох, хантараак баттаспатаҕым. Тута Санкт-Петербурга көспүтүм.
— Оттон кэлин Дьокуускайга төннөр санаалааххын дуо?
— Билбэтим ээ, бириэмэ көрдөрүө.
Бу күннэргэ “Мисс Виртуальная Якутия-2016” интэриниэт-куоластааһына саҕаланна. Быйылгы күрэхтэһиигэ өрөспүүбүлүкэ араас улуустарыттан 21 кыыс финалга таҕыста. Саамай элбэх куолаһы хомуйбут кыыс “Мисс Виртуальная Россия-2017” куонкурус финалыгар быһа кыттар бырааптаныаҕа.
Бэй. корр., https://edersaas.ru