Киров куоракка ыытыллыбыт искусственнай сиэмэлээһин техник-осеменатордарын Бүтүн Арассыыйатааҕы уон бэһис уонна селекционер-зоотехниктар Бүтүн Арассыыйатааҕы бастакы куонкурустарыгра Саха сириттэн тыа хаһаайыстыбатын миниистирин солбуйааччы Виктор Павлов салалтатынан «Сахаагроплем» тэрилтэ дириэктэрин солбуйааччы Николай Степанов, Амма улууһуттан «Абаҕа» кэпэрэтиип техник-осеменатора Людмила Андреева, Ньурба улууһуттан Хорула нэһилиэгин техник-осеменатора Аркадий Федотов итиэннэ Сунтаар улууһуттан «Кириэстээх» кэпэрэтиип кылаабынай зоотехнига Августа Трифонова кытыннылар.
Күрэхтэһиигэ Арассыыйа 61 эрэгийиэниттэн 86 техник-осеменатор, 56 селекционер-зоотехник кэлбит. Үгүстэр хаһыс да төгүллэрин кытталлар, бэл, онус төгүлүн күрэхтэһээччилэр бааллар эбит. Түмүккэ Кировскай уобалас хамаандата бастаата, Татарстан иккис миэстэни ылла. Биһиги дьоммут маннык улахан түһүлгэҕэ аан-бастаан таҕысталлар даҕаны, бэркэ кытыннылар. Техник-осеменатордарбыт теорияны билиигэ, ынаҕы сиэмэлээһиҥҥэ хайҕаннылар, ол эрээри кэпсииллэригэр нууччалыы саҥарары ыарырҕаталлара атахтаата. Селекционер-зоотехниктар куонкурстарыгар Августа Трифонова теорияҕа уон баалтан уону ылан баран, «Селекс» компьютернай бырагыраамаҕа үчүгэйдик киирэ илик буоламмыт, онно доҕолоҥноон биэрдэ.
Инньэ гынан. миэстэлэспэтэр даҕаны Арассыыйа Тыатын хаһаайыстыбатын министиэристибэтин Дипломунан бэлиэтэнэн, араас эрэгийиэннэртэн кэлбит биир идэлээхтэрбитин кытары уопут атастаһан, элбэҕи билэн-көрөн кэллибит диэн бу куонкурус жюритыгар үлэлээбит «Сахаплемхолбоһук» ААУо искусственнай сиэмэлээһиҥҥэ салаатын салайааччыта Татьяна Протопопова кэпсээтэ.
Раиса Сибирякова, «Саха сирэ» edersaas.ru.