Оскуола бэлэмэ

Ааптар: 
Бөлөххө киир:

Балаҕан ыйыгар диэри аҕыйах хонук хаалла. Оскуолалар төһө бэлэмнээхтэрий? Быйыл өрөспүүбүлүкэ үрдүнэн бастакы кылааска төһө оҕо киирэрий? Эдэр учууталлар тыа сирин оскуолаларыгар төһө тиийдилэр? Итинтэн да атын ыйытыыларга СӨ үөрэҕин уонна наукатын министиэристибэтин пресс-сулууспатын исписэлиистэрэ хоруйдаатылар.


— Саҥа үөрэх дьылын оскуолалар хайдах бэлэмнээх көрсөн эрэллэрий?

— Бэлэмнэнии үлэтэ күн бүгүнүгэр диэри тигинэччи салҕанан бара турар. Оскуолалар өрөмүөннэрэ хайдах түмүктэнэн эрэрин көрүү, сыаналааһын үлэтэ ыытыллар. Атырдьах ыйын 11 күнүнээҕи туругунан, өрөспүүбүлүкэ үрдүнэн 190 орто оскуолаҕа, 155 оҕо саадыгар, 27 эбии үөрэхтээһин тэрилтэтигэр өрөмүөн үлэлэрэ ыытылла тураллар. Атырдьах ыйын 20 күнүгэр барыта түмүктэнэн бэлэм  буолуохтаахтар. Үөрэх дьыла барыларыгар балаҕан ыйын 1 күнүт­тэн саҕаланыахтаах.

— Тыа сирин оскуолаларыгар эдэр учууталлар төһө үлэлии баралларый? Ханнык улуустар кыһаларыгар? Эдэр учууталлары тыа сирдэригэр үлэлэтэргэ туох ыытылларый?

— Былырыын үөрэх кыһатыгар орто уонна үрдүк анал үөрэҕи бүтэрбит 394 выпускник үлэлии барбыта. Мантан 178 үрдүк үөрэҕи, 216 – орто профессиональнай үөрэҕи бүтэрбиттэрэ. Балартан 77-тэ хотугу уонна арктическай улуустарга үлэлии барбыта. Манна даҕатан эттэххэ, 2016 сыллаахха ХИФУ бакалавриаты бүтэрбит­тэртэн 170 выпускник үлэлииргэ быһаарыммыт, атыттар магистратураҕа үөрэхтэрин салгыыллар.

Тыа сирин оскуолаларыгар саҥа үлэлии барар эдэр учууталларга СӨ үөрэх министиэристибэтэ  айаннарын суолун уонна биир кэмнээх босуобуйа төлүүр. Бу сыалга «СӨ үөрэҕи сайыннарыы 2012-2019 сылларга» бырагыраама чэрчитинэн, сыл ахсын 5 мөл.солк. тахсалыы үп көрүллэр. Судаарыстыба өйөбүлүнэн профессиональнай үөрэх кыһатын бүтэрбит 400 выпускник сыл ахсын туһанар. Маны таһынан, «2012-2019 сс. хаачыстыбалаах олорор дьиэнэн хааччыйыы» СӨ судаарыстыбаннай бырагырааматын «Тыа сирин педагогическай үлэһиттэрин уонна Арктикаҕа уонна хотугу улуустарга доруобуйа харыс­табылын тэрилтэлэригэр үлэлиир медицина үлэһиттэрин олорор дьиэнэн хааччыйыы» хос бырагырааманан үлэ тиһиктээхтик салҕанар. Бу бырагыраама 2006 сылтан ылата үлэлиир, эдэр исписэлиистэр болҕомтолорун тардар. Биллэн турар, маны сэргэ, хаачыстыбалаах үөрэххэ болҕомто күүһүрэр.

— Быйыл бастакы кылааска өрөспүүбүлүкэ үрдүнэн төһө оҕо киирэрий?

— 2017-2018 үөрэх дьылыгар 16 000 оҕо бастакы кылааска киириэ. Ордук элбэх оҕо Дьокуускайга, Нерюнгрига уонна Мирнэйгэ киирэрэ бэлиэтэнэр.

— Оттон 11 кылааһы төһө оҕо бүтэриэхтээҕий?

— 2017-2018 сылга 11-с кылааһы уопсайа 8000 тахса оҕо бүтэриэхтээх.

— Учууталларга быйылгы үөрэх дьылыгар туох тэрээһин былааннанар?

— Учуутал аатын-суолун үрдүктүк тутар сыаллаах-соруктаах «Педагогикаҕа старт» диэн педагогическай үөрэҕи бү­тэрэр устудьуоннарга анаан профессиональнай куонкурус ыытыллар. Кинилэр манна кыттаннар, бастатан туран, педагог идэтэ диэн тугун-хайдаҕын, төһө улахан эппиэтинэс­тээҕин чугастык билэллэр-көрөллөр. Маны сэргэ, дьон-сэргэ биһирэбилин киэҥник ылбыт куонкурустарбыт «Сыл Учуутала», «Сыл Баспытаатала», «Педагог-бибилэтиэкэр» буолуох­тара. Педагогическай дьаарбаҥка чэрчитинэн үөрэх тэрилтэлэрин дириэктэрдэрин солбуйааччыларыгар «Бастыҥ настаабынньык», ону сэргэ, эбии үөрэхтээһин педагогтарыгар, оҕо саадын үлэһиттэригэр «Призвание — воспитатель» куонкурустар уо. д. а. ыытыллыахтара.

Сардаана НИКОЛАЕВА, «Саха сирэ» хаһыат, edersaas.ru 

+1
0
+1
0
+1
0
+1
0
+1
0
+1
0
+1
0