Бүгүн Оскуола бибилэтиэкэтин Норуоттар икки ардыларынааҕы күнэ бэлиэтэнэр. Бу күн бырааһынньык быһыытынан 1999 сыллаахха ЮНЕСКО көҕүлээһининэн баар буолбута. Алтынньы төрдүс бэнидиэнньигэр бэлиэтэнэр.
2008 сылтан ыла, биир күнүнэн тэрээһин ыытыллара тутах, оҕону ааҕыыга сыһыарарга уһун кэм ирдэнэр диэн санаанан салайтаран, оскуола бибилэтиэкэтин ыйа диэн уһатан биэрэр буолбуттара.
Тэрээһин сүрүн сыалынан – классическай уонна аныгы литэрэтиирэ саппааһыгар, өрүү саҥардылла турарыгар наадыйар оскуола бибилэтиэкэтигэр уопсастыба болҕомтотун тардыы буолар. Бу күн кинигэ ааптардарын кытта оҕолору көрүһүннэрииттэн саҕалаан, араас тэрээһиннэр ыытыллаллар.
История
Кылгастык, история быыһын сэгэтэр эбит буоллахха, Арассыыйаҕа оскуолаларга бибилэтиэкэ 17-с үйэ бүтүүтэ, Москва олохтоохторун туруорсууларынан баар буолбута дииллэр. Маҥнай гимназияларга, кадеттар куорпустарыгар, реальнай училищеларга, орто уонна алын үөрэх кыһаларыгар, церковнай-приходской оскуолаларга итиэннэ үөрэх атын тэрилтэлэригэр тэриллибиттэрэ.
Арассыыйаҕа 19-с үйэ отутус сылларын саҥатыгар гимназиялар иһинэн номнуо 62 уонна уонунан училищеҕа бибилэтиэкэ арыллыбыта диэн Бикипиэдьийэҕэ ыйыллар. Оскуола бибилэтиэкэтэ сайдыытыгар улахан быһаарыылаах оруолу 1860-с сыллардааҕы уларыта тутуу оонньообута. Норуодунай оскуолалары тэрийээһин саҕаламмыта. Нэһилиэнньэттэн хомуллар үп-харчы уонна үөрэх төлөбүрэ көмөлөспүтэ.
Сыыппаралар, чахчылар
Саха сиригэр 583 оскуола бибилэтиэкэтэ баар
47,9 % ааҕар саалалаах
8,8 % информационнай-компьютернай технологияҕа холбонор кыаҕа суох
65 % биирдии көмпүүтэрдээх
37 % —10 тыһ. тахса кинигэ
30 % — 5-10 тыһ. кинигэ
27 % — 1-5 тыһ. кинигэ
6 % — 1 тыһ. аҕыйах кинигэ фондалаах.
Людмила ПОПОВА, “Саха сирэ” хаһыат, edersaas.ru
Хаартыскалар — интэриниэттэн.