close
podpiska

Оскуола дириэктэрдэрэ атах тэпсэн олорон тугу кэпсэттилэр?...
Кыһа - Олох-дьаһах

Оскуола дириэктэрдэрэ атах тэпсэн олорон тугу кэпсэттилэр?

Бу күннэргэ өрөспүүбүлүкэ үөрэҕин тэрилтэлэрин салайааччыларын I форума ыытылынна. Манна Саха сирин оскуолаларын, уһуйааннарын дириэктэрдэрэ муһуннулар. Бэл диэтэр, ыраах айаны аахсыбакка, Муома, Эбээн Бытантай, Дьааҥы курдук улуустартан тиийэ кэлбиттэр.

edersaas.ru

Куорат тыһыынчаттан тахсалыы үөрэнээччилээх оскуолата дуу, эбэтэр тыа сирин уһук нэһилиэгин сэттэ уонча үөрэнээччилээх оскуолата дуу, биллэн турар, бары өттүнэн уратылаахтар. Онон тэрээһин дириэктэрдэри түмэн уопут атастаһыытын тэрийэр сыаллаах. Ол курдук, салайааччылар өрөспүүбүлүкэ, куорат тарбахха баттанар үөрэхтэрин кыһаларыгар —В.П.Ларионов аатынан физикэ-тиэхиньиичэскэй лиссиэйгэ, куорат классическай гимназиятыгар, лиссиэйгэ, Дьокуускай куорат национальнай гимназиятыгар, “Кванториумҥа”, “Прометейчик” оҕо саадыгар сылдьан, хайдах үлэлии олороллорун, оҕолору хайдах бэлэмнииллэрин, каадыр бэлиитикэтин хайдах ыыталларын, үөрэҕи таһынан дьарыктары көрдүлэр-иһиттилэр.

Итини сэргэ, СӨ Үөрэҕин уонна наукатын министиэристибэтин итиэннэ туһааннаах бэрэбиэркэлиир уорганнар салайааччыларын кытта атах тэпсэн олорон, тутууттан саҕалаан, хамнаска тиийэ ирэ-хоро кэпсэттилэр, кыһалҕалаах ыйытыыларыгар хоруйдары ыллылар.

СӨ Үөрэҕин тэрилтэлэрин салайааччыларын  сойууһун бэрэсидьиэнэ Юрий Семенов: “Дириэктэрдэр сойуустарын сүрүн соруга – үөрэх сайдыытыгар дьайыы. Оскуолаҕа быһаччы үлэлиир дьон быһыытынан бэйэбит санаабытын тиэрдиэхтээхпит. Учууталлары бэлэмниир каадыр бэлиитикэтигэр хас биирдии оскуола, улуус ирдэбилэ учуоттаныахтаах. Ол иһигэр дириэктэрдэр министиэристибэҕэ даҕаны, институттарга, университеттарга даҕаны сакаас оҥоруохтаахтар.

Чинчийии көрдөрбүтүнэн, дириэктэрдэр улахан аҥаардара хаһаайыстыбаннай оруолу толороллор. Оттон сэбиэскэй кэм саҕана хайдах этэй? Дириэктэр — учууталлар учууталлара этэ. Биллэн турар, ис өттүнээҕи тэрил тупсаҕай буолара эмиэ суолталаах. Ол гынан баран, оскуола, бастатан туран, оҕолор, педагогтар үөрэнэллэригэр, үлэлииллэригэр, сайдалларыгар усулуобуйаны олохтуохтаах. Салайааччылар түмсүөхтээхтэр, өрөспүүбүлүкэҕэ үөрэх сайдарын туһугар көхтөөх буолуохтаахтар уонна саха дириэктэрдэрэ дуо, дэтиэхтээхтэр”, — диэн санаатын тиэртэ.

Санатан эттэххэ, Сойуус былырыыҥҥыттан тэриллэн үлэлээн эрэр. Туспа юридическай сирэйи тэрийэр былааннаахтар. Форум түмүгүнэн министиэристибэҕэ бэйэлэрин этиилэрин  киллэриэхтэрэ.

 

Людмила ПОПОВА, “Саха сирэ” хаһыат, edersaas.ru

Хаартыска — интэриниэттэн.

 

#бүгүн: 1
3
0

Сайт матырыйаалларын ааптар көҥүлэ суох ылар бобуллар.