От ыйын 2 күнүнээҕи туругунан, Тыа хаһаайыстыбатын министиэристибэтигэр түмүллэр сыыппараларынан сирдэттэххэ, былааннаммыт оттон 20,2 бырыһыана, ол эбэтэр 99270 туонна от кэбиһилиннэ. Бу былырыыҥҥы туһааннаах кэм көрдөрүүтүттэн 18 бырыһыанынан итэҕэс уонна кыраапыктан 45 бырыһыанынан хаалан иһэр.
edersaas.ru
Тыа хаһаайыстыбатын миниистирин э.т. Александр Атласов хаалыы сүрүн төрүөтүн өрөспүүбүлүкэ үгүс өттүгэр нэдиэлэ устата ардаан, отчуттары атахтаабытынан быһаарар. Улуустарынан ырыттахха, улахан былааннаахтарга Амма 36 (кыраапыктан – 97), Хаҥалас 30 (80), Мэҥэ Хаҥалас уонна Ньурба 26 (69), Уус Алдан 25 (67) бырыһыанныы толорон иһэллэр. Уу хабалатыгар ылларбыт Орто Халыма 19 (53), Өймөкөөн 3 (9), Эбээн Бытантай 1 (2) бырыһыаннаахтар.
Александр Павлович иһитиннэрбитинэн, “Туймаада-Нефть” НХ уонна “Саханефтегазсбыт” АУо дуогабар түһэрсибит хаһаайыстыбаларга уматыгы иэс биэрэ тураллар итиэннэ күн-дьыл кубулҕатыттан эмсэҕэлээбит улуустарга мобильнай биригээдэлэри тэринэллэригэр көрсүбүт ороскуоттарын толуйар туһунан дьаһалга бу күннэргэ бырабыыталыстыбаҕа илии баттаннаҕына, көрүллүбүт 21,8 мөл. солк. тута ыытыллыа.
Манна сыһыаран эттэххэ, ТХМ от үлэтин тэтимнээхтик ыытар инниттэн үүт туттарар ыалларга, хаһаайыстыбаларга атырдьах ыйынааҕы үүт харчытын бу ый иһинэн толору ыытарга эрэннэрэр. Ону сэргэ “Саҕалааччы фермер” гранын (81 киһиэхэ – 174 мөл. солк.), 100 хаһаайыстыбаҕа сылгы базатын тутууга 100 мөл. солк. уонна 30 нэһилиэккэ дьон дьарыктаах буолуутун тэрийиигэ 30 мөл. солк. кээмэйдээх өйөбүл үптэр эмиэ атырдьах ыйыгар сүүс бырыһыан тиксэриллиэхтэрэ.
Василий НИКИФОРОВ, edersaas.ru