Быйыл сайын Челябинскай уобаласка доҕотторугар ыалдьыттыы тиийэн баран, Николай Лаптев дьон үксэ бэрт дьоҕус тиэхиньикэни сүүрдэ сылдьарын көрөн, сүрдээҕин сөхпүт.
edersaas.ru
Саха сиригэр бэрт наадалаах тэрил буоларын өйдөөт, дойдутугар кэлэн, балаҕан ыйыгар бэйэ дьыалатынан тэринэн, тыа сиригэр олус наадалаах тиэхиньикэни аҕалан батарарга санаммыт. Ааспыт өрөбүллэргэ дьоҕус бизнес урбаанньыта бэрт туһалаах тэрили тыа хаһаайыстыбатын үлэһиттэрин бырааһынньыгар анаммыт быыстапка-дьаарбаҥкаҕа көрдөрө турарыгар түбэһэн кэпсэттим.
— Аччыгый кыамталаах тиэхиньикэ от охсор, хомуйар тыраахтар курдук. Сири хорутан, хортуоппуй олордор уонна хомуйар тэрилинэн эмиэ буолуон сөп. Ол курдук, бу дьоҕус тэрил 30-ча араас көрүҥнээх үлэни толорорго аналлаах.
Сыаната кытай тыраахтарынааҕар быдан чэпчэки. «Кытайы» атыыластаххына учуокка туруораҕын, тиэхиньикэ бары ирдэбилин тутуһаҕын. Оттон дьоҕус тэрили дьиэ таһыгар наадаҕар эрэ туттаҕын. Гарааска, наадыйбат, кыра уматыгы сиир буолан, быыстапкаҕа бу тэрили үгүс киһи интэриэһиргээтэ.
«Кыһыл Октябрь-Нева» сабыылаах акционернай тэрилтэ маннык мотблогу 1985 сылтан Санкт-Петербург куоракка оҥорон таһаарар. 2014 сыллаахха тэрилтэ оҥоһуга хаачыстыбалааҕын иһин Санкт-Петербург куорат Бырабыытылыстыбатын үрдүкү бириэмийэтигэр тиксибит, — диэн кэпсиир урбаанньыт.
Кырдьык, тыа сиригэр олус туһалаах тэрил мантан инньэ үгүс киһи интэриэһин тардыыһы.
Елена ПОТОЦКАЯ, «Саха сирэ» хаһыат, edersaas.ru
Ааптар хаартыскаҕа түһэриитэ.