Дьокуускай куоракка от ыйын 1 күнүттэн Арассыыйаҕа айан бастакы универсальнай төлөбүрүн киллэриэхтэрэ. Оптуобус төлөбүрүн, аны, урукку курдук уу харчынан уонна тырааныспар каартатынан эрэ буолбакка, баан каартатынан итиэннэ смартфон көмөтүнэн төлүүр кыахтаныахпыт. Бу туһунан куорат дьаһалтатын пресс-сулууспата иһитиннэрэр.
edersaas.ru
Кулун тутартан саҥа систиэмэни тестовай эрэсиимҥэ үлэлэтэн көрбүттэрэ. Технологтар бырагырааманан хааччыллыытын барытын бэрэбиэркэлээтилэр. Күн бүгүн куорат бары оптуобустарыгар каартаттан уонна смартфонтан төлөбүрү устан ылар анал тэриллэри (валидатордары) туруордулар. «ЯПАК» МУТ тэрилтэ салайааччыта Сергей Максимов этэринэн, маннык ньыманан үлэлииргэ бэлэмнэр.
«Дьон айанын аныгы олоххо сөп түбэһиннэрэн, табыгастаах оҥорор туһугар саҥа тэрили атыылаһарга 80 мөл. солк. тутуннубут», — диэн этэр кини.
Оптуобуһунан айаны электроннай көрүҥүнэн төлүүр систиэмэни «Штрих-М» уонна «Эрлайн» Арассыыйатааҕы хампаанньалар оҥордулар. Саҥа тэрил чиэк биэрэр, ону таһынан, чэпчэтиилээх айанынан туһанар нэһилиэнньэ араҥатын эмиэ билинэр.
От ыйын 1 күнүттэн өскөтүн бу саҥа тэрил каартаттан, эбэтэр смартфонтан харчыны сатаан ылбатаҕына, дьон босхо айанныан сөп диэн куорат дьаһалтатыгар этэллэр. Кэлэр ый маҥнайгы күнүттэн куорат уопсастыбаннай тырааныспарыгар уу харчынан айан төлөбүрэ 30 солк., баан каартатынан 25 солк. «Спутник», тырааныспар каартатынан, электроннай кумааһынньыгынан 23 солк. буолуо.
Айан каартата салгыы үлэлиэ
Маны таһынан, 60 хонуктаах: 20-тэ айанныыр айан каартатын – 450 солк., 40-на айанныыр айан каартатын – 800 солк., 60-на айанныыр айан каартатын – 1000 солк. атыылаһыахха сөп. Оттон 60-на айанныыр 30 хонуктаах айан картатын – 1100 солк. Оччотугар айан саамай чэпчэки төлөбүрэ – 16 солк. тэҥнэһэр.
Бу туһунан сиһилии куорат уокуругун дьаһалтатын тырааныспарга отделыгар – 40-80-94, эбэтэр Киин диспетчерскэй сулууспаҕа – 42-48-14 эрийэн билсиэххитин сөп.
Марианна ТЫРТЫКОВА, «Саха сирэ» хаһыат, edersaas.ru