close

Үөһээ бүлүүлэр миниистир Охлопковтан интэриниэти ирдээтилэр...
Олох-дьаһах

Үөһээ бүлүүлэр миниистир Охлопковтан интэриниэти ирдээтилэр

Ааспыт нэдиэлэҕэ  Үөһээ Бүлүүгэ СӨ ситэриилээх былааһын 2017 сыллааҕы үлэтин отчуоттаата.  Отчуоту үс бөлөххө арахсан туруордулар. СӨ доруобуйа харыстабылын миниистирэ Михаил Охлопков салайааччылаах маҥнайгы бөлөх икки күн устата Сургуулук, Боотулуу, Мэйик, Маҥаас, Далыр уонна Оҥхой нэһилиэк­тэригэр сылдьан отчуоттаата. edersaas.ru

 

Сургуулукка

Олохтоохтор саҥа оскуола уонна фельдшерскэй-амбулаторнай пуун тутууларын күүскэ туруорустулар.  Миниистир Михаил Охлопков: «2018-2019 сылларга Арассыыйа үрдүнэн фельдшерскэй-амбулаторнай пууннары тутууга 3 млрд 400 мөл. солк. көрүллүөхтээх. Итинтэн регионнарга 100-түү мөл. солк. тыырыллыахтаах. Ол аата биһиги өрөспүүбүлүкэбитигэр 2 ФАП тутуллуохтааҕыттан, биирэ Сургуулукка тутуллуо», — диэн эрэннэрбитин, олохтоохтор ытыс тыаһынан көрүстүлэр.

«Восточнай» космодромтан көтөр аракыаталар тобохторо ыаллыы сытар Бүлүү улууһун Үгүлээтин сиригэр-уотугар түһэринэн сибээстээн, Сургуулук нэһилиэнньэтин доруобуйатын анал медицинскэй көрүү уонна сиригэр-уотугар экологическай бэрэбиэркэ ыытылларын туруорсубуттара саамай сөптөөх.

Боотулууга

160 миэстэлээх таас оскуола 2018-2019 сс. тутуллар буолбутун истэн, олохтоохтор сүргэлэрэ көтөҕүлүннэ. Интэриниэт ситимэ хаһан тупсарын туһунан, олох-дьаһах, хомунаалынай хаһаайыстыбаҕа, энергетика боппуруостарыгар сыһыаннаах ыйытыылары биэрдилэр. Үөһээ Бүлүү — Боотулуу хайысхатынан оҥоһуллубут суолу ардахтаах кэмҥэ харыстыыры, тыа хаһаайыстыбатыгар ыанар ынах аайы харчынан көмө көрүллүөхтээҕин, саҥа бэкээринэ тутуллар буоллаҕына, оборудованиетын ылыыга көмө наадатын туруорустулар.

 

Оҥхойго

Олохтоохтор, күөллэр ууларын аһара түһэрбиттэрин түмүгэр билигин сүөһү уулууругар уу суоҕун туһунан эттилэр. Этэргэ дылы, сүөһүлэри кый ыраах сытар ойбонноругар илдьэллэригэр-аҕалалларыгар икки чаас ааһар эбит. Онон маны хайдах эмэ гынан уһаппакка быһаарары туруорустулар.

Үтүө дьыала хамсааһын чэрчитинэн, култуурунай-спортивнай дьиэни тутуу этэҥҥэ салҕанар буолбут. Ол курдук, быйыл 3 мөл. 620 тыһ. солк. көрүллэн, эбийиэк култуураҕа аналлаах өттө тутуллуоҕа. Оттон спортивнай өттө (саалата) 2019 сылга ситэриллиэҕэ.

 

Маҥааска

Оскуолалара быстар мөлтөх туруктааҕынан сибээстээн, саҥа дьиэ бырайыагын оҥоруу саҕаланыахтааҕа этилиннэ. Киһи улаханнык ыарыйдаҕына кэлэр санрейс бөртөлүөтэ кииҥҥэ киириэн баҕалаах дьону тоҕо ылбатын ыйыттылар. Ыарыһаҕы эрэ ыларын өйдөөбөттөрүн эттилэр, дьиҥэр, итиччэ кэлбит көтөр аал барыан баҕалаахтары ылыа да эбит диэн хом санааларын эттилэр. Онуоха санрейс бөртөлүөтэ тус сыалын эрэ толорон, ыарыһаҕы эрэ ылыахтааҕын туһунан быһаардылар.

Далырга

Олохтоохтор бастакы уочарат балыыһаларыгар «суһал көмө» массыыната хаһан кэлэрин ыйыттылар. Манна тустаах миниистир Михаил Охлопков быйыл медицинскэй тэриллээх массыынаны хайаан даҕаны биэриэхпит диэн эрэннэрдэ. Маны тэҥэ, быйылгыттан Далырдааҕы балыыһаҕа стоматолог ыстаата көрүллэн, анал исписэлиис үлэлии кэлиэхтээҕин истэн олохтоохтор олус үөрдүлэр.

 

Мэйиккэ

Иһэр уу боппуруоһа кытаатан эрэрин кэпсээтилэр. Скважинаны оҥоруохтаах эбиттэр даҕаны, анаалыс түмүгүнэн онно баар уу аһара тимирдээҕин быһаарбыттар. Былырыыҥҥыттан саҕалаан нэһилиэк аҥарыгар сайыҥҥы уу ситимин тардыбыттар, быйылгыттан ону ситэриэхтээхтэр. Оскуолалара орто буоларыгар туруорустулар. Үөрэнээччи ахсаана элбии турара этилиннэ. Ол курдук, ааспыт үс сылга 20 саҥа дьиэ тутуллубут.

 

Түмүк

Бүлүү өрүс хаҥас биэрэгэр сытар нэһилиэктэр кыһалҕалара, туруорсуулара, сүнньүнэн, биир соҕус. Ол курдук, суолу оҥорууну, оскуолалары тутууну, хапытаалынай өрөмүөннэри, үрдүлэринэн аракыата көтөрүнэн сибээстээн нэһилиэнньэ доруобуйатын көрүүнү-истиини, тулалыыр эйгэни бэрэбиэркэлиири, өрүс уҥуор сытар нэһилиэктэргэ анаан сүөһүнү өлөрөр, астыыр комплексы, уо.д.а боппуруостары туруорсаллар, аһаҕастык этинэллэр. Олохтоохтор СӨ бырабыыталыстыбатын ааспыт сыллааҕы үлэтин бары биир киһи курдук, биир санаанан биһирииллэрин эттилэр.

Александр ТАРАСОВ,

«Үөһээ Бүлүү» хаһыат кылаабынай эрэдээктэрэ.

 

#бүгүн: 1
0
0

Сайт матырыйаалларын ааптар көҥүлэ суох ылар бобуллар.