Саха сирин оториноларингологтара бүтүн Арассыыйатааҕы форумҥа кытыннылар

Бөлөххө киир:

Балаҕан ыйын 20-21 күннэригэр Москваҕа ведомстволар икки ардыларынааҕы Бүтүн Арассыыйатааҕы медицинскэй конгресс уонна Арассыыйа оториноларингологтарын бүтүн Арассыыйатааҕы форумнара буолла.

edersaas.ru

Конгресска кыайан истибэт, истэр уорганнарыгар кэһиллиилээх дьоҥҥо оҥоһуллар медицинскэй көмөнү сайыннарыы инники кэскиллэрин дьүүллэстилэр.

Конгресска Саха сириттэн бастыҥ исписэлиистэр, Өрөспүүбүлүкэтээҕи 2 №-дээх балыыһа-Суһал медицинскэй көмө киинин быраастара Наталья Лебедева уонна Федор Терютин кытыннылар.

Оториноларингология салаатын дьоһун суолталаах кыһалҕаларын, ол иһигэр, кохлеарнай имплантация ньыматынан оҥоһуллар медицинскэй көмө туһунан дьүүллэстилэр. Истэр-саҥарар уорганнары чөлүгэр түһэриигэ үөскүүр кыһалҕалары медицина, үөрэхтээһин, быраап уонна технология өттүлэриттэн аан бастаан ырытан көрдүлэр.

Научнай конференциялары, семинардары, маастар-кылаастары сэргэ Арассыыйаҕа уонна омук сирдэригэр оҥоһуллар фармацевтическай уонна чөлүгэр түһэрэр препараттар быыстапкалара улахан сэҥээриини ылла.

Истибэт оҕолор хомуска оонньууллар

Мөлтөхтүк истэр дьоҥҥо «Олох мелодията» бүтүн Арассыыйатааҕы бэстибээл аан бастаан ыытылынна. Манна Саха сириттэн аныгы үйэ сүҥкэн эпэрээссийэтин оҥотторбут, а.э. кохлеарнай имплантаннаах оҕолор кытыннылар. Имплантаннаах оҕолор истэр буолбуттарын тэҥэ, барабааҥҥа уонна хомуска олус үчүгэйдик оонньууллар.

Манна даҕатан эттэххэ, РФ Доруобуйа харыстабылыгар министиэристибэтин штаты таһынан кылаабынай оториноларинголога Николай Дайхес бу оҕолору тус бэйэтинэн ыҥырбыта уонна кэлэр-барар ороскуоттарын уйуммута. Николай Аркадьевич Дьокуускайга кэлэ сылдьан, бу оҕолор хомуска оонньуур буолбуттарын биһирээн барбыта.

Надежда ЕГОРОВА, «Саха сирэ» хаһыат, edersaas.ru 

+1
0
+1
0
+1
0
+1
0
+1
0
+1
0
+1
0