Оттуга тиийбэт Саккырыыр

Бөлөххө киир:

Нэдиэлэ саҥата  сарсыарда эрэдээксийэҕэ Эбээн Бытантай улууһун Саккырыыр нэһилиэгин баһылыга Егор Васильев киирэн кэллэ. Кини «ДьУОКХ»  ГУТ гаас конденсатын ситэри тиэрдибэккэ, оҕолор оскуола тымныыта бэрдиттэн халыҥ таҥастаах олорон үөрэнэллэрин, социальнай эбийиэктэр уонна олорор дьиэлэр тоҥ хаһаа буолбуттарын, быйыл кыһын саахала суох туоруурга эрэлэ суоҕун  кэпсээтэ.

edersaas.ru 


Олохтоохтор таһырдьа кэтэр халыҥ таҥастарын устубакка да утуйалларын эттэ. Маннык туругунан 1800 кэриҥэ нэһилиэнньэлээх бөһүөлэк кыстыгы хайдах туоруура биллибэт.

Кини бу тыын кыһалҕаны быһаартара куоракка кэлэн, «ДьУОКХ»  ГУТ, борокуратуураҕа, Ил Түмэҥҥэ сылдьыбыт. Олохтоохтор  суруйбут суруктара WhatsUpp ситиминэн тарҕанар.

Саккырыыр баһылыга Егор Дмитриевич Васильев: 

— Быйылгы оттук сезона олус ыараханнык саҕаланна. Социальнай эби­йиэктэр, дьиэлэр тоҥ хаһаа олорор төрүөттэрэ — бу саас суол сабыллыытын саҕана Баатаҕайтан 500 туонна оттук ситэри тиэллибэккэ хаалбыта. Панов диэн «ДьУОКХ»  ГУТ дуогабардаспыт киһитэ гаас конденсатын сороҕун тиэрдибэтэҕэ. Ким эрэ тиэйбитигэр-тиэйбэтэҕэр дьон буруйа суох, кэмигэр сылааһынан хааччыллыахтаах этилэр. Олохтоохтор киин ититии ситимигэр холбонон олороллор, ким даҕаны мас хаһаамматаҕа, сорохтор оһохторо да суох. Оттук тиийиэ суоҕа диэн куттанан, дьиэ хам тоҥмотун эрэ курдук барбах оттобут. Үгүстэр ититэр тэрили холбоон, уот харчытыгар хас бүк төлүүллэрэ биллибэт.   Быйылгы кыһыны саахала суох туоруурга ханнык да эрэлим суох. Бу куоракка кэлэн туһааннаах биэдэмистибэлэри кэрийэ сылдьабын. Борокуратуураҕа кытта үҥүстүм. Бары суоҕу, сатамматы кытта олороллор.

Саккырыыр дьиэлэригэр билигин муҥутаан +12-16С0 сы­­лаас, сүүрбэҕэ да тиийбэт. Оҕо саада үлэлии илик, оттон оскуола оҕолоро таһырдьа кэтиллэр халыҥ таҥастарынан олорон үөрэнэллэр.

Виктор Губарев, Ил Түмэн вице-спикерэ:

— Муус устар 20 күнүгэр диэри Баатаҕайтан Саккырыырга 4700 туонна гаас конденсата оттугу тиэр­диэхтээх этилэр, онтон 500 туонната тиксэриллибэккэ хаалбыта. Ол биир төрүөтэ диэн, 350 км усталаах айан суола сэрэхтээх учаастак ахсааныгар киирэр, онно биир да сапыраапка суох. Уопсайа 17 тырааныспар оттугу тиксэрэргэ үлэлии сылдьыбыта, ону хас биирдии массыынаҕа тахограф, ускуораһы хааччахтыыр тэрил, оттугу тиэйэргэ көҥүл баар буолуохтаах диэн ирдэһэн, кыһыҥҥы суол сабыллан эрдэҕинэ ГИБДД үлэһиттэрэ массыыналары тохтотон кэбиспиттэрэ. 

Маннык түгэн хоту улуустарга аны хатыламматын туһугар, оттук сап­пааһын эрдэттэн хаһааныахха наада. Билиҥҥитэ суол хаһаайыстыбатын үлэһиттэрэ кыһыҥҥы суолу болдьоҕуттан эрдэлээн, сэтинньи 10 кэнниттэн эргийэн айанныыр суолунан аһар санаалаахтар. Оттук саппааһа ОДьКХ Эбээн Бытантайдааҕы салаата иһитиннэрэринэн, ахсынньыга диэри тиийиэхтээх.  

Тырааныспар министиэристибэтэ, «ДьУОКХ»  ГУТ уонна бырабыыталыстыба балаһыанньаны тус хонтуруолга ыллылар. 

Урбаанньыт кыайан толорбото

«ДьУОКХ»  ГУТ генеральнай дириэктэрин солбуйааччы Жан Бурцев Саккырыыртан төлөпүөнүнэн маннык иһитиннэрдэ:

— Үөһээ Дьааҥы улууһугар оттугу тиэрдэргэ урукку өттүгэр үс бэдэрээтчиттээх этибит, ону сэрэхтээх таһаҕаһы тиэйэргэ ирдэбил кытаатан, ГЛОНАСС тахограбы туруортарары ирдээбиттэрэ. Ол харчытыгар оҕустаран, биир эрэ киһи хаалбыта. Панов дуогабардаспыт кээмэйин кыайан толорботоҕо. Онтон сылтаан, оттукпутун кэмчилээн, улахан тымныы түһүөн иннинэ күһүөрү температураны кыччатан биэрбиппит. Дьиҥэр, кэмчилээн отуннахха, саппаас ахсынньы 8 күнүгэр, толору отуннахха, сэтинньи 28-гар диэри тиийэр кыахтаах. 

Сэтинньиттэн дьиэлэр сылыйалларын курдук оттуохпут. Ититии ситэри бэриллибэтэх кэмигэр нэһилиэнньэҕэ хос аахтарыы (перерасчет) оҥоһуллуоҕа.

Суол-иис хаһаайыстыбатын үлэһиттэрэ сэтинньи 12-гэр кыһыҥҥы суол быһа холоон, аһыллыан сөбүн эттилэр. Онон сэтинньи 20-гэр диэри ситэри тиэрдиллибэтэх оттук Саккырыырга тиийиэ диэн эрэнэбит. Билиҥҥиттэн уҥуор биэрэккэ туоруур суолу күрдьэн, оҥоро сылдьаллар.

Сэтинньи 6-8 күннэригэр ОДьКХ генеральнай дириэктэрэ Виктор Омуков Саккырыырга кэлэн, туох үлэ ыытылларын тус бэйэтэ көрүөхтээх.

Түмүк

ОДьКХ эрэннэрэринэн, сэтинньиттэн Саккырыыр бөһүөлэгэр ититиини биэрэр хааччаҕы устан, толору оттуохтаахтар. Үөһээ Дьааҥы бүтүн аан дойдуга -60С тымныы муҥутуур оройунан биллибит улуус, дьиҥэ, бастатан туран, сылааһынан хааччыллыахтаах этэ.

Марианна ТЫРТЫКОВА, «Саха сирэ» хаһыат, edersaas.ru

+1
0
+1
0
+1
0
+1
0
+1
0
+1
0
+1
0