Онон, кэнники кэмнэргэ, чахчыта даҕаны, элбэх кинигэ бэчээккэ таҕыста, элбэх айымньы сүрэхтэннэ. Улуус литературнай түмсүүтэ айар, тэрийэр үлэҕэ ситимнээх үлэни ыытарын түмүгэр, норуоттан тахсыбыт талааннар СӨ Суруйааччыларын сойууһун чилиэнинэн буоллулар. Оттон бу олох соторутааҕыта суруйааччылар, бэйиэттэр —«Отуу уота» түмсүү чилиэннэрэ түмсэннэр, салайааччыларын Александр Дунаевы кэрэ-бэлиэ үбүлүөйүнэн итиитик-истиҥник эҕэрдэлээн, баҕа санаа бастыҥын анаатылар, ырыа ылбаҕайын ыллаатылар, хоһоон хомоҕойун айдылар, аахтылар!
“Отуу уота” литературнай түмсүү чилиэннэрэ Иван Бубякин — Чөҥөчөк, Мария Мохначевская-Марта Мария уонна Егор Феофанов – олус көхтөөх, айар куттаах, үлэһит дьон.
— Түмсүү ыытар үлэтигэр өрүү кытталлар, сонун хоһооннорун бэлэхтииллэр, саҥа сүүрээннэри киллэрэллэр. Өрөспүүбүлүкэтээҕи куонкурустарга хайаан даҕаны кытталлар. Бу ыйга «Күрүлгэн» сурунаалга таҕыстылар. Оттон улууспут «Эҥсиэли» хаһыатыгар – күүтүүлээх ыалдьыттар. Хастыы да кинигэ ааптардара. Бэтэрээннэр сааһырдыбыт диэн олорунан кэбиспэттэр, литературнай-поэтическай эйгэни, олоҕу кытта тэҥҥэ хаамсаллар, — диир биир идэлээхтэрин туһунан “Отуу уота” литературнай түмсүү салайааччыта, суруйааччы Александр Дунаев.
Бүтэйдии махтал
/И.А. Бубякин-Чөҥөчөк А.Г. Дунаев 65 сааһыгар анабыл хоһоонуттан/
Бэҕэһээ киэһээ остуолга
Уруй этии күөдьүйдэ.
Ырай курдук киэҥ саалга
Ырыа көтөн дьиэрэйдэ.
Ааты мээнэ тиэрпэппин,
Харыстааммын аспаппын,
Албан ааты аахпаппын,
Кырыы тылга биэрбэппин.
Айар дьоҕур суолтатын
Манна билэн үөрдүлэр,
Устан ааһар олохтон
Талаан хаалыа дэстилэр.
Баһылыктар хастарый?
Суоччут көрдүү сүүрдүлэр,
Култуураттан, кулууптан
«Кууһунан» кэлэн турдулар…
Иллээх Түмэн аҥаара,
Алгыыр санаа эттилэр,
Дыгын Дархан аҥаара
Дьоҕур баарын тиэртилэр…
Сүүһүн туолар «Чолбоммут»
Сырдаппытын кэпсээтэ,
Иэйэр куттаах «Күрүлгэн»
Ытыс биэрэн көрүстэ.
Дьокуускайтан Нам Түмсүү,
Миниистирдэр бүтүннүү,
Араадьыйа аҥаара,
Эрэдээктэр арааһа…
Ыалдьыт элбэх сүүһүнэн,
Араас аһыҥ — күүскүнэн,
Хамаҕатта күннээтэ —
Эфир устун күрээтэ…