Дьокуускайга бүгүн үп-харчы уонна социальнай өҥөлөр дьаарбаҥкаларын Элбэх өҥөнү оҥорор киин тэрийдэ.
Женни СТРЮКОВА, “Саха сирэ” хаһыат, edersaas.ru
Куорат олохтоохторо дьаарбаҥкаҕа өҥө араас көрүҥүнэн туһаннылар. Манна дьиэ-уот өҥөтүгэр оҥоһуллар субсидияттан саҕалаан нолуок тэрилтэтиттэн бааннарга тиийэ бааллар. Сорохтор сиргэ сыһыаннаах мунаахсыйбыт ыйытыыларын быһаартардылар. Инбэлииттэри үөрэтиигэ анаммыт сүбэни анал техникум үлэһитэ биэрдэ. Тустаах ыал субсидиянан туһанар кыахтаах дуу, суох дуу диэн аахтаран көрүөххэ эмиэ сөп.
Маны тэҥэ, дьоҕус предпринимательствонан дьарыктаныан баҕалаахтар эмиэ наадыйар сүбэлэрин ыллылар. Коммунальнай өҥөнү төлүүргэ анал сайт нөҥүө киирэн төлөһүүнү үөрэттилэр. «Таатта» баан отделениетын салайааччыта үөрэхтээһиҥҥэ анаммыт уурдарыыны астарыахха сөбүн туһунан кэпсээбитин тус бэйэм кэрэхсээтим. «Сбербаан» үлэһитэ баан каартатын хайдах табыгастаахтык туһаныахха сөбүн сүбэлээтэ. Исписэлиис этэринэн, баан каартатын инники сирэйигэр баар нүөмэри куттаммакка киһиэхэ этиэххэ сөп, оттон кэннигэр баар үс сыыппараны эттэххэ, ытыс соттуохха сөп эбит. Сэргэх тэрээһин кэмигэр үпкэ-харчыга сыһыаннаах ыйытыыларга оонньуу ыытылынна, онно супер-бириис оонньонно.
Женни СТРЮКОВА, “Саха сирэ” хаһыат, edersaas.ru