«Кыһын Саха сириттэн саҕаланар» Бүтүн Арассыыйатааҕы бэстибээл чэрчитинэн, Дьокуускайга сынньалаҥ пааркатыгар «Үтүө санаалаах хаар киһи» куонкурус буолла. Бу туһунан Дьокуускай куорат уопсастыбаннаһы уонна иһитиннэрэр-биллэрэр маассабай сириэстибэлэри кытары үлэҕэ Департамена иһитиннэрэр.
Куонкурус аата да этэрин курдук, манна күөн көрсөөччүлэр хаар киһини оҥорон илин-кэлин түһүспүттэр. Киһини эрэ сэргэхситэр бэртээхэй күрэхтэһиини Дьокуускай куорат дьаһалтатын култуураҕа уонна духуобунай сайдыыга управлениета, сынньалаҥ пааркатын дьаһалтата тэрийбиттэр. Тэрээһин сүрүн сыала-соруга куорат дьоно сынньалаҥнарын туһалаахтык атааралларыгар, хас кыһын ахсын хаар киһини оҥорор үтүө үгэһи умнубакка салгыылларыгар, хас биирдии дьиэ кэргэн уопсастыбаннай олоххо көхтөөхтүк кыттарыгар, эдэр ыччат чэгиэн, чөл олоҕу тутуһарыгар туһаайыллыбыт.
Быйылгы күөн күрэскэ түөрт хамаанда кыттыбыт. Түргэн туттуу, сатабыл, баай фантазия сыаналаммыт. Ол түмүгэр, I миэстэни “Анжелика дьоло” композицияларынан Тумусовтар дьиэ кэргэн ылан үөрүү-көтүү өрөгөйө буолбут. II бириистээх миэстэҕэ Акимовтар дьиэ кэргэн тиксибиттэр. III миэстэҕэ 29 №-дээх оскуола 8 «Б» кылааһын эйэлээх хамаандата тахсан, оҕолор эҕэрдэ эгэлгэтин туппуттар. Маны сэргэ, «Азбука» хампаанньа анал бирииһин Акимовтар дьиэ кэргэҥҥэ туттарбыт.
Хаартыскалар: Дьокуускай куорат уопсастыбаннаһы уонна иһитиннэрэр-биллэрэр маассабай сириэстибэлэри кытта үлэҕэ Департаменыттан