СӨ Тырааныспарын уонна суол хаһаайыстыбатын министиэристибэтин пресс-сулууспата иһитиннэрбитинэн, Өлүөнэ өрүскэ гидрологическай балаһыанньа уларыйан,бүгүҥҥүттэн, ол эбэтэр алтынньы 26 күнүттэн «Дьокуускай» судоходнай хампаанньа паромнарын сырыыта тохтотулунна.
Кини оннугар маршрукка «НОВЭК» ХЭУо икки суудуната таҕыста. Судоходнай хампаанньа нөҥүө кытыыга Төхтүр сэлиэнньэтин аннынан причал бэлэмнээтэ. Дьокуускайтан паромнар Мархинкаттан (Даркылаах) айанныахтара. Маны таһынан, «Өлүөнэтээҕи холбоһуктаах пароходство» Жатай – Төхтүр хайысхатынан баржаны үлэлэтиэҕэ.
Сыана туһунан кэпсиир буоллахха, СӨ Сыана бэлиитикэтин судаарыстыбаннай кэмитиэтэ иһитиннэрбитинэн, Дьокуускай — Аллараа Бэстээх хайысхатынан үрдэтиллибит тарыыптар былырыын күһүн олохтоммут сыананан хаалбыттара. Инньэ гынан, кыра массыыналарга тарыып 685 солк. саҕалаан 2940 солк. диэри. Пассажирдары таһар оптуобустарга – 4420 – 7875 солк., таһаҕаһы тиэйэр массыыналарга, ол иһигэр «ГАЗ», «КАМАЗ», «МАЗ», «УРАЛ», «КРАЗ» тарыып 3450 солк. саҕалаан 37175 солк. диэри быһыллыбыт. Анал тиэхиньикэҕэ, ол иһигэр 20 тоннаҕа диэри ыйааһыннаах кырааннарга, бульдозердарга тарыып 29300 солкуобайтан 44105 солкуобайга диэри олохтоммут. Пассажирдарга тарыып 220 солк., оҕолорго (5 – 10 саастаахтарга) 110 солкуобай.
Анивера Акимова, «Саха сирэ» хаһыат, edersaas.ru