Нам улууһун Партизан нэһилиэгин урбаанньыта Елена Эверстова 2007 сыллаахтан «Тирэх» ТХПК-та туһата суох турбут бэкээринэтин атыылаһан, өрөмүөннээн, чөлүгэр түһэрэн, бэкээринэ тэриммитэ. Бастакы сылларыгар икки туонна килиэби буһарара. Кэлиҥҥи 11 сыл устата сайдан, кэҥээн, түргэн туттунуулаах үлэһиттэр ыйга 40-тан тахса туонна килиэби буһаран таһааран, улуус олохтоохторун сибиэһэй килиэбинэн хааччыйаллар.
Урбаанньыт үлэтэ-хамнаһа тахсыылаах буоларын ситиһэр сыалтан саҥа бэкээринэни үлэҕэ киллэрдэ. Онон, килиэп, буулка, кондитерскай ас арааһын буһаран куорат маҕаһыыннарыгар тириэрдэр буолуоҕа. Билигиҥҥи туругунан, оҥорон таһаарар бородууксуйата Нам улууһун 27 уонна Тулагы нэһилиэгин 4 маҕаhыыныгар атыыланар.
Елена Эверстова үлэтэ, дьиэ кэргэнин дьыалата урукку сыллартан дьоҥҥо-сэргэҕэ убаастабылы ылар. Саһарчы буспут тотоойу килиэп итиилии Партизаҥҥа тарҕанар буолан, бэйэ бэкээринэтин биир бастакынан олохтоохтор биһирииллэрин этэллэр.
Килиэп таһар массыыналара уокка былдьанан кыһалҕалар үөскүү сылдьыбыттара, ону этэҥҥэ туораан, бар дьон уонна улуус дьаһалтатын көмөтүнэн килиэп таһарга аналлаах икки массыына ылыммыттара. Манна эбии бэйэлэрин үптэрин эбэн өссө эбии биир массыынаны атыыласпыттара.
Күн бүгүн бэкээринэ уон үлэһиттээх, инникитин Елена эбии өссө уон киһиэхэ үлэ миэстэтин таһаарар былааннаах. Үлэ-хамнас оннуттан сыҕарыйан, саҥа сыахха оҥорон таһаарар бородууксуйа кэҥиэҕэ.
Семен Аргунов, Нам улууһа
edersaas.ru сайтка анаан