Харчылаах патриотизм

Ааптар: 
Бөлөххө киир:

Аҕа дойдуну көмүскээччилэр күннэрэ чугаһаата. Ону кытта төрөппүттэр “төбөлөрүн ыарыыта” саҕаланна. Тоҕо? Ороскуота элбэҕэ бэрт. Кэлиҥҥи кэмҥэ Аҕа дойдуну көмүскээччилэр күннэрэ уһуйаантан саҕалаан, үөрэх бары тэрилтэлэригэр көрүнньүк эрэ бырааһынньыкка кубулуйда. edersaas.ru

Аҕа дойдуну көмүскээччилэргэ аналлаах тэҥҥэ хаамыыга маршировкаҕа аҕыйах мүнүүтэ кэтээри, таҥаска 5-10 тыһ. солк баранар. Нэһилиэктэр Дьокуускайтан Кытай ырыынагыттан сакаастыыллар. Оттон дьокуускайдар, аһары баран, кырата 5-тии тыһ. солк. тиктэрэллэр эбэтэр букатын олоччу Москваттан сакаастыыллар. Быһатын эттэххэ, урбаанньыттары байыталлар. Ама даҕаны патриотизм тыыныгар ииппиттэрин иһин, бас быстар сыана эбээт. Баҕар, ким эрэ икки-үс сыл устата кэтэллэр диэҕэ. Оннук. Ол эрээри, 5 тыһ. солк. төрөппүт барыта биирдэ ууран биэрэр кыаҕа суох эбээт. Араас дохуоттаах, араас кыһалҕалаах ыал элбэх.  Ону учуоттаабаттар. Аны учуутал ирдээбэт, төрөппүттэр бэйэлэрин көҕүлээһиннэрэ дииллэр. Букатын сыыһа. Учуутал ирдэбилэ буолбатаҕын иһин, оскуолаттан саҕалаан үөрэх управлениета ыытар тэрээһинэ эбээт. Төрөппүт оҕото атыттартан итэҕэс санамматын, туора тутуллубатын туһугар кыһалҕаттан төлүүрүгэр эбэтэр тик­тэрэригэр күһэллэр.

Ыччаты дьиҥнээх күүстээх, хорсун санааҕа, дойдутун туһугар ууга-уокка да түһэрин кэрэйбэт патриоттуу тыыҥҥа буолбакка, олоххо көтүмэхтик сыһыаннаһарга иитэбит. Ити кэннэ аармыйаттан саһаллара да сөп курдук. Дойду туһугар ытык иэс туһунан өйдөбүлэ суох, Аармыйа туһунан аҥаардастыы “дедовщина” эрэ туһунан истэр ыччат аармыйаҕа тоҕо дьулуһуой. Уһаабыта уонча мүнүүтэ хайдах хаамалларын, ырыа ыллыылларын уонна, саамай сүрүнэ, таҥастарын-саптарын көрөллөр. Онто суох төрөөбүт дойдуга тапталы иҥэрэр, Аҕа дойдуну көмүскүүргэ үөрэтэр, патриотизм тыыныгар иитэр кыаллыбат үһү дуо? Хаһааҥҥыттан патриотизм харчыга атыылаһыллар буолбутай? Тоҕо туһааннаах министиэристибэ, управление болҕомтоҕо ылбатый? Дьиҥэр, тэри­йэр дьон куонкурус балаһыанньатыгар уолаттарга хара бүрүүкэ, маҥан ырбаахы, кыргыттарга хара дьууппа, маҥан куопта ирдэнэр диэн суруйдулар да, бүттэҕэ ол дии.

Кыра дохуоттаах дьон хамнаһын үрдэтэр туһугар бүддьүөт­тэн төһөлөөх харчыны барыылларый? Онтулара ити курдук көрүнньүк бырааһынньыктарга күдээринэ күлүбүрүүр.

Людмила ПОПОВА, “Саха сирэ” хаһыат, edersaas.ru

Хаартыска интэриниэттэн.

+1
0
+1
0
+1
0
+1
0
+1
0
+1
0
+1
0