Павел Пинигиҥҥэ “Россия Федерациятын физическэй култууратын бочуоттаах үлэһитэ” аат бэлиэтэ туттарылынна

РФ бэрэсидьиэнэ Владимир Путин 2017 сыл атырдьах ыйын 17 күнүнээҕи 373 №-дээх уурааҕынан физическэй култуура уонна спорт сайдыытыгар, уһун сыллаах үтүө суобастаах үлэтин иһин “Спорка үрдүкү маастарыстыба оскуолата” Саха Өрөспүүбүлүкэтин судаарыстыбаннай тэрилтэтин дириэктэрин солбуйааччы Павел Павлович Пинигиҥҥэ “Россия Федерациятын физическэй култууратын бочуоттаах үлэһитэ” бочуоттаах аат иҥэрилиннэ.

Павел Павловичка бочуоттаах аат бэлиэтин балаҕан ыйын 27-гэр Дьокуускайга Суорун Омоллоон аатынан Опера уонна балет тыйаатырыгар буолбут Саха Өрөспүүбүлүкэтин Судаарыстыбаннаһын күнүгэр анаммыт өрөспүүбүлүкэ уопсастыбаннаһын үөрүүлээх мунньаҕар СӨ Ил Дархана Егор Борисов туттарда.

Ыспыраапка

Пинигин Павел Павлович – көҥүл тустууга Монреаллааҕы Олипмийскай оонньуулар (1976 с.) чөмпүйүөннэрэ, аан дойду, Европа чөмпүйүөнэ.

“Бочуот Знага” уордьан (1976 с.), Саха сирин үрдүкү наҕараадатын – “Хотугу Сулус” уордьан (2006 с.) кавалердара, Саха АССР физическэй култууратын үтүөлээх үлэһитэ, норуоттар икки ардыларынааҕы категориялаах экстра кылаастаах судьуйа (1994 с.), Саха сирин ХХ үйэҕэ спордун лауреата, Дьокуускай куорат уонна Чурапчы улууһун бочуоттаах гражданина, Ил Түмэн дьокутаата.