close
Павел Пинигин: “Арыйаан Тютрин үрдүк таһымнаах бөҕөс буоларын итэҕэттэ”...
Дьулуур - Олох-дьаһах

Павел Пинигин: “Арыйаан Тютрин үрдүк таһымнаах бөҕөс буоларын итэҕэттэ”

Бүгүн Дьокуускайга, “Триумф” Спорт киинигэр Москва уобалаһын Одинцово куоратыгар буолбут көҥүл тустууга Арассыыйа чөмпүйэнээтин түмүгүнэн суруналыыстарга пресс-кэмпириэнсийэ буолла.


Көрсүһүүгэ өрөспүүбүлүкэ спорка миниистирин бастакы солбуйааччы Семен Чердонов, көҥүл тустууга Саха сирин сүүмэрдэммит хамаандатын сүрүн тириэньэрэ Владимир Кириллин, дойду быйылгы чөмпүйэнээтин боруонса призера Арыйаан Тютрин, спорка үрдүкү маастарыстыба оскуолатын преподаватель-тириэньэрэ Иван Дмитриев, спортивнай тустууга өрөспүүбүлүкэтээҕи федерация вице-бэрэсидьиэнэ, олимпийскай чөмпүйүөн Павел Пинигин кыттыыны ыллылар. Кэпсэтиини спорт миниистирэ Георгий Балакшин иилээн-саҕалаан ыытта.

ССРС үтүөлээх маастара Павел Пинигин былырыыҥҥы чөмпүйэнээт призердара Виктор Рассадин (65 кг), Дмитрий Аксенов (61 кг) үөһэ ыйааһыҥҥа тахсан күүс холоспуттарын ахтан туран, быйыл эмиэ үс бастыҥ иһигэр киирэр кыахтаахтара эрээри, бэйэлэрин көрдөрбөтүлэр, аһыллан тустубатылар диэтэ.

Бу түһүлгэҕэ 57 киилэҕэ диэри ыйааһыҥҥа тустубут Арыйаан Тютрин дойду чөмпүйэнээтин пьедесталын үһүс төгүлүн дабайыыта бу кини үрдүк таһымнаах бөҕөс буоларын туоһулуурун эттэ. Итиэннэ инникитин кыайыы туһугар өссө дьаныардаахтык үлэлиэн наадатын ыйда.

Оттон Петр Павлов, Эдуард Григорьев (61 кг), Дьулустаан Булатов (65 кг), Тимур Николаев (70 кг) ыйааһыннарыгар бэһис миэстэлэри ылан, дойду сүүмэрдэммит хамаандатын кэҥэтиллибит састаабыгар киирэри ситиспиттэрэ үөрдүбэт буолуон сатаммат диэтэ, бу туох да саарбаҕа суох уолаттарга санааларын күүһүрдүөҕүн эттэ. Манна кимиилээхтик тустубут Тимур Николаевы ойуччу тутан бэлиэтээтэ.

Судьуйалааһын туһунан санаатын үллэстэн, Павел Павлович тустуук хаһан да судьуйаҕа саарбаҕалыыр санааны күөттүө суохтаах, ол инниттэн көбүөргэ утарылаһааччытыттан икки төбө үрдүк буоларын, баһыйарын итэҕэтиэхтээх диэтэ.

Уонна түмүгэр бөҕөстөрбүтүн тириэньэрдэринээн, инникитин саҥа кыайыылары ситиһэр туһуттан, күүстээх үлэ күүтэрин эттэ.

Роман ПОПОВ, “Саха сирэ” хаһыат,  edersaas.ru

Ааптар хаартыскаҕа түһэриитэ.

#бүгүн: 1
1
0

Сайт матырыйаалларын ааптар көҥүлэ суох ылар бобуллар.