Дьокуускайга «Дохсун» спорт комплекска “Эдэр профессионаллар” (WorldSkills Russia) чөмпүйэнээт финалыгар сүүмэрдиир күрэхтэһии буолан бүттэ. Ол түмүгэр, Дьокуускайдааҕы педагогическай колледж алын сүһүөх кылаас оҕолорун үөрэтэр салаа 3 кууруһун устудьуона Лена Ефимова кыайыылааҕынан тахсан, Уһук Илин уокурук аатыттан WorldSkills национальнай чөмпүйэнээтин финалыгар кыттар чиэскэ тигистэ. Бу туһунан колледж пресс-сулууспата иһитиннэрдэ.
Людмила ПОПОВА, “Саха сирэ” хаһыат, edersaas.ru
Сүүмэрдиир күрэхтэһиигэ Россия 45 регионун бэрэстэбиитэллэрэ кытыннылар. Устудьуоннар ааспыт нэдиэлэ тухары билиилэрин, сатабылларын көрдөрдүлэр. Сүрүн түһүмэҕинэн уруок ыытыы уонна кылааһы таһынан дьарык буолла. Кинилэри 45 эксперт кэтээн көрдө.
Лена Ефимова чаҕылхай ситиһиитэ — Дьокуускайдааҕы педагогическай колледж сыаллаах-соруктаах үлэтин түмүгэ. Тустаах үөрэх кыһатын базатыгар “Алын кылаас оҕолорун үөрэтии” диэн хайысхалаах анал былаһаакка арыллыбыта. Былырыын Лена өрөспүүбүлүкэ күрэхтэһиитин ааһан, Уһук Илин уокуругар үһүс миэстэни ылары ситиспитэ. Салгыы дьарык, быраактыка, колледж бастыҥ методист-педагогтарын кытта үлэ — кыайыыга тирэҕинэн буоллулар диэн пресс-сулууспа үлэһитэ иһитиннэрэр.
Педагогическай колледж устудьуона информационнай технологияны (интерактивнай дуоска, проектор, электроннай куоластааһын систиэмэтэ) сатабыллаахтык туһанна диэн экспердэр бэлиэтииллэр. Оттон Гуманитарнай-технологическай университет проректора Элина Яковлева аныгы учууталтан информационнай технология сайдыытын толору баһылыыра ирдэнэрин, онон педагогтары бэлэмниир үөрэх кыһаларын үрдүк технологиянан хааччыйыы аныгы ирдэбилгэ эппиэттиир буолуохтааҕын ыйар.
Санатан эттэххэ, чөмпүйэнээт финала ыам ыйыгар Краснодарга ыытыллыаҕа. Лена Ефимова онно кытта барыаҕа.
Людмила ПОПОВА, “Саха сирэ” хаһыат, edersaas.ru