РФ Бэрэсидьиэнэ Владимир Путин 2013 с. алтынньы 15 күнүнээҕи дьаһалынан, дойду 30 регионугар саҥа Перинатальнай киин тутуллуохтааҕа. Олортон биирдэстэрэ бүгүн Саха сиригэр үөрүүлээх быһыыга-майгыга аһылынна.
Уһук Илиҥҥи региоҥҥа биир сүҥкэн эбийиэги үөрүүлээх быһыыга-майгыга арыйыы сиэригэр-туомугар РФ бырабыыталыстыбатын бэрэссэдээтэлин солбуйааччы, Уһук Илиҥҥи уокурукка РФ Бэрэсидьиэнин боломуочуйалаах бэрэстэбиитэлэ Юрий Трутнев, СӨ Ил Дархана Егор Борисов, РФ Судаарыстыбаннай Мунньаҕын дьокутаата Галина Данчикова, СӨ Судаарыстыбаннай Мунньаҕын (Ил Түмэн) бэрэссэдээтэлэ Александр Жирков, СӨ бырабыыталыстыбатын бэрэссэдээтэлэ Евгений Чекин, Дьокуускай к. баһылыга Айсен Николаев, СӨ доруобуйа харыстабылын миниистирэ Михаил Охлопков, Медицина национальнай киинин генеральнай дириэктэрэ Николай Лугинов, СӨ бырабыыталыстыбатын, Ил Түмэнин бэрэстэбиитэллэрэ кытыннылар.
Юрий Трутнев: «Саха сирин олохтоохторо, эһигини барыгытын саҥа Перинатальнай киин аһыллыбытынан эҕэрдэлиибин! Манна элбэх кырачаан төрүөҕэр, кинилэр инникитин өрөспүүбүлүкэ сайдыытыгар көмөлөһүөхтэригэр, Арассыыйаны аатырдыахтарыгар эрэнэбин», — диэн Перинатальнай кииҥҥэ доруобай оҕолор төрүүллэригэр баҕа санаатын тириэртэ.
СӨ Ил Дархана Егор Борисов:
«Биһиги бүгүн, дойду Бэрэсидьиэнин талыы быыбара буолаары турдаҕына, Перинатальнай киини В.Путин быһаччы сорудаҕынан үлэҕэ киллэрдибит. Онон В.Путин сорудахтарын олоххо киллэриини кытары сибээстээх уочараттаах эбийиэк аһыллыбытынан барыгытын эҕэрдэлиибин. Ону өрөспүүбүлүкэ олохтоохторо сыаналыахтара диэн эрэнэбин.
Кэнники сылларга доруобуйа харыстабылын салаатыгар ыытар үлэлэрбитинэн сибээстээн, үчүгэй түмүктэри ыллыбыт. Ол иһигэр уһун үйэлэнии эбилиннэ. Бу барыта медицина хайысхатынан хааччыйыы тупсубутун кытары сибээстээх. Кырачаан оҕо өлүүтэ аҕыйыыра, элбэх оҕо төрүүрэ – биһиэхэ дьоһун суолталаах. Маныаха барытыгар Перинатальнай киин курдук саҥа эбийиэктэр улахан оруоллаахтар. Саҥа эбийиэккэ, быһа холуйан, 1800 саҥа тэрил туруорулунна», – диэн тутааччыларга уонна үлэ хаамыытын хонтуруолга ылбыт СӨ Доруобуйа харыстабылын министиэристибэтин үлэһиттэригэр махтанна.
Галина Данчикова өрөспүүбүлүкэ бары олохтоохторугар күүтүүлээх эбийиэги тутууга Федерация улаханнык көмөлөспүтүн киэн туттан бэлиэтээтэ.
«Доруобуйа харыстабылыгар туһааннаах үп көрүллэн, доруобуйа харыстабылын үлэһиттэрин хамнастарын үрдэтиини, техническэй-материальнай базаны тупсарыыны ситистибит, – диэн РФ Бэрэсидьиэнэ В.Путин сокуону оҥорооччуларыгар, судаарыстыбаннай былаас уорганнарыгар туруорар соруктарын ситиһиигэ үтүө хардыы оҥоһуллубутун бэлиэтээтэ.
ххх
Дьокуускай куоракка өрөспүүбүлүкэтээҕи Перинатальнай киин атаҕа 2014 с. ахсынньыга түһэриллибитэ. Саҥа тутуу уопсай суумата 3 миллиард 839 мөлүйүөн 225 тыһыынчаҕа тэҥнэһэр. Онтон 798 мөлүйүөнэ – өрөспүүбүлүкэ бүддьүөтүттэн.
Саҥа кииҥҥэ 598 исписэлиис, ол иһигэр 137 быраас уонна 245 орто сүһүөх үлэһит баар. Исписэлиистэри 2013 сылтан бэлэмнээн барбыттара. Онон атын балыыһалартан үрдүк таһымнаах быраастары көһөрбөтүлэр.
«Дьокуускайга иккис Перинатальнай киин тоҕо нааданый?» диэччилэр эмиэ бааллара. Онуоха СӨ доруобуйа харыстабылын миниистирин солбуйааччы Людмила Вербицкая:
—Итинник ыйытааччыларга «Перинатальнай киини кэлэн көрүҥ. Кэрэ аҥаардарбыт көрүдүөргэ сыталлар – куойка тиийбэт. Өрөспүүбүлүкэҕэ 100 дьахтартан 50-на араас патологиялаах. Кэнники сылларга 40-45 саастарын ааспыт дьахталлар оҕолонор буоллулар. Бүгүҥҥү туругунан, 850 дьахтар ЭКО-нан оҕолонуон баҕарар» диэбиппит. Билигин Перинатальнай кииҥҥэ үрдүк технологиялаах медицинскэй көмөҕө наадыйааччылар өрөспүүбүлүкэ бары улуустарыттан киириэхтэрэ», – диэн быһаарбыта.
Дьокуускайга саҥа Перинатальнай кииҥҥэ номнуо 51 оҕо (ол иһигэр игирэлэр) күн сирин көрдө.
Надежда ЕГОРОВА, «Саха сирэ» хаһыат, edersaas.ru
Андрей Сорокин уонна ааптар түһэриилэрэ