Петр Филиппов кыайыытын ийэлээх аҕатыгар анаата

Ааптар: 
Бөлөххө киир:

Манчаары Оонньууларын иккис күнүн биир бэлиэ түгэнинэн уолаттарга Мэҥэ Хаҥалас спортсмена Петр Филиппов ыстаҥаҕа өрөспүүбүлүкэ саҥа рекордун олохтообута буолла.

Биллиилээх атах оонньооччута Борис Ильин иитиллээччитэ ыстаҥаҕа  43 миэтэрэ 98 см түһэн, 2008 сыллаахха «Азия оҕолоро» норуоттар икки ардыларынааҕы оонньууларга Ньурба эдэр спортсмена Иван Никифоров көрдөрүүтүн — 43 миэтэрэ 55 см — миэтэрэ аҥарын курдугунан тупсарда.

Манна даҕатан эттэххэ, Петр саха оҕолоруттан бастакынан Арассыыйаҕа бастыыр иһин күрэхтэһиигэ уһуну ыстаныыга 6 м 50 см түһэн,чөмпүйүөн үрдүк аатын ылбыта. Эмиэ онно үстэ төхтүрүйэн ыстаныыга 13 м 32 см көрдөрүүлэнэн иккис миэстэҕэ тахсыбыта.

Күрэхтэһии кэнниттэн өрөспүүбүлүкэ саҥа рекордсмена, спорт маастара, ону тэҥэ Майатааҕы лицейин кыһыл көмүс мэтээллээх выпускнига «Саха сирэ» хаһыат кэрэспэдьиэнин ыйытыыларыгар хоруйдаата.

Манчаары Оонньууларыгар тириэньэрбинээн Борис Николаевичтыын күүскэ бэлэмнэммиппит. Былаан быһыытынан кылыыга 44 миэтэрэни, ыстаҥаҕа 43 миэтэрэни ыстанар соруктааҕым. Бэҕэһээ кылыыга 44 миэтэрэ 31 сантиметры кылыйан бастаабытым. Куһаҕана суох көрдөрүү дии саныыбын. Ол эрээри өссө үчүгэйдик ыстаныахха сөбө, эбэр кыах баара.

Бүгүҥҥү рекорпун дьоммор — ийэбэр Екатерина Семеновнаҕа, аҕабар Петр Павловичка — аныыбын. Уонна улахан махталбын тириэньэрбэр Борис Николаевичка тиэрдэбин. Кини миэхэ иккис аҕам курдук чугас киһим. Сэттэ сааспыттан иитэн-такайан, спорка сыһыарбыта. Бу күннэргэ Борис Николаевич соҕуруу күрэхтэһиигэ оҕолору салайан кытыннара сылдьар. Тириэньэрим аттыбар суоҕа куһаҕан эбит, Борис Николаевич бүгүн сүбэлээбитэ-амалаабыта буоллар өссө ыраахха ыстаныам эбитэ буолуо.

Мин уһуну ыстаныынан дьарыктанабын, онно эмиэ бастыҥ көрдөрүүлэммит киһи диэн ыра санаалаахпын.

Үөрэхпин Хотугулуу-Илиҥҥи университекка салгыыр баҕалаахпын, математика инстутутугар. Спорт олохпор сөбүлүүр дьарыкпынан хаалыаҕа.

Роман Попов, «Саха сирэ» хаһыат

+1
0
+1
0
+1
0
+1
0
+1
0
+1
0
+1
0