Бүгүн сарсыарда «Петр Первэй» диэн почта сөмөлүөтэ Москватта кэлэн түстэ. Сөмөлүөтү Саха сиринээҕи Почта управлениятын салайааччыта Алевтина Игнатьева уонна сибээс миниистирэ Александр Борисов көрүстүлэр. Александр Ильич сөмөлүөт кабинатыгар киирэн, штурвалга олордо.
Кэлиҥҥи сылларга почтанан таһаҕаһы тиэйии кээмэйэ биллэ улаатан, Россия Почтата бэйэтэ авиа-пааркаланан, Москваттан Дьокуускайга диэри ТУ-204С сөмөлүөт 30 тоннаҕа диэри таһаҕаһы тиэйиэҕэ.
Ол курдук бастакы рейс «Петр I» сөмөлүөтүнэн Москва – Нижневартовскай – Дьокуускай хайысханан Внуково аэропордуттан оҥоһулунна. Онтон иккис «Екатерина II» суудуна Москва – Иркутскай – Анадырь хайысханан көтүөхтээҕин туһунан Россия Почтатын генеральнай дириэктэрэ Дмитрий Страшнов иһитиннэрдэ.
Россия Почтата «Ильюшин Финанс Ко» хампаанньаттан икки сөмөлүөтү 3,3 млрд. солк. атыыласпыт. РФ Сибээһин уонна маассабай коммуникациятын миниистирэ Николай Никифоров этэринэн, почта бэрт удамыр сыанаҕа табыгастаахтык икки улахан суудунаны атыыласпыт.
Онон биһиги өрөспүүбүлүкэбитигэр баһыылкалар, хаһыаттар, сурунааллар Москваттан уһаабакка-кэҥээбэккэ түргэнник кэлэр буолуохтара.
Видеону уонна хаартысканы Ася Соловьева ыытта.
Анивера АКИМОВА.