Ыам ыйын 17-21 күннэригэр Хабаровскай куоракка Сэбиэскэй Сойуус Дьоруойа Константин Коротков кэриэһигэр боксаҕа “А” кылаастаах норуоттар икки ардыларынааҕы турнир буолла.
Роман Попов, “Саха сирэ” хаһыат, edersaas.ru
Тохсус төгүлүн ыытыллыбыт күрэхтэһиигэ Азербайджантан, Таджикистантан, Арменияттан, Афганистантан, Беларусьтан, Бельгияттан, Венгрияттан, Швецияттан, Казахстантан, Киргизияттан, КНДР, Китайтан, Латвияттан, Молдоваттан, Монголияттан, Польшаттан, Корея Өрөспүүбүлүкэтиттэн, Узбекистантан, Эстонияттан уонна Арассыыйаттан 150 боксер кытынна.
Күрэхтэһии түмүгүнэн Арассыыйа Федерациятын боксердара уон үс ыйааһынтан уонугар кыайыы көтөллөннүлэр. КНДР, Казахстан,Узбекистан спортсменнара биирдии чөмпүйүөннэннилэр.
Саха сирин сүүмэрдэммит хамаандатыттан Нурсултан Халыкбаев (52 кг, ХИФУ-Дьокуускай) уонна Егор Пахомов (64 кг, ХИФУ-Горнай) боруонса мэтээллэри ыллылар.
Билигин Комсомольск-на-Амуре куоракка үөрэнэр уонна эрчиллэр Ньурба ыччата, спорт маастара Петр Васильев 64 киилэҕэ диэри ыйааһыҥҥа бу улахан күрэхтэһиигэ үһүс төгүлүн пьедестал үрдүкү үктэлин дабайда.
Манна даҕатан эттэххэ, Петр аҕатын — кик-боксиҥҥа спорт үтүөлээх маастара, аан дойду (1995, 1997), Европа (1994, 1996), Азия (1994) чөмпүйүөннэрэ, Арассыыйа үс төгүллээх (1995, 1996, 1997) чөмпүйүөнэ Василий Васильев – аатын рингэҕэ дьоһуннук ааттатар. Кини 18 саастааҕар спорт маастарын нуорматын толорбута, эдэрдэргэ Арассыыйа 2014 сыллааҕы күрэхтэһиитин, “Принц Кубога” (Таиланд), Totano elite Boxing event» (Испания) норуоттар икки ардыларынааҕы турнирдар призердарынан буолар.
Роман Попов, “Саха сирэ” хаһыат, edersaas.ru