Соҕуруу Корея Пхенчхан куоратыгар түмүктэммит XXIII кыһыҥҥы Олимпийскай оонньууларга Арассыыйа спортсменнара икки кыһыл көмүс, алта үрүҥ көмүс уонна тоҕус боруонса мэтээллэри ылары ситистилэр. Уонна мэтээллэрин ахсаанынан олохтоохтору кытта алтыс миэстэни үллэһиннилэр. Бастакы миэстэҕэ отут тоҕус мэтээллээх Норвегия таҕыста.
edersaas.ru
Арассыыйа бырабыыталыстыбатынан бигэргэммит балаһыанньаҕа олоҕуран, Олимпийскай оонньууларга кыһыл көмүс мэтээли ылбыттар бүддьүөттэн 4 мөлүйүөн солкуобайынан, иккис, үһүс миэстэлэммиттэр туһааннааҕынан 2,5 уонна1,7 мөлүйүөнүнэн биһирэниэхтэрэ. Маны таһынан спордун көрүҥүн федерациятыттан, регионуттан бириистэри ылыан сөп.
Омук дойдулара олимпиецтарын кыайыытын эмиэ харчынан бириистэринэн бэлиэтиир эбиттэр. Ол курдук, Германияҕа кыһыл көмүс мэтээл иһин 20 тыһыынча дуоллар (1 мөл. 134 тыһ. солк.), үрүҥ көмүс иһин — 15 тыһыынча дуоллар, боруонса иһин — 10 тыһыынча дуоллар. Италияҕа уонна Белоруссиҕа олимпийскай чөмпүйүөннэригэр — 150 тыһыынча дуоллар (8 мөл. 505 тыһ. солк.), Канадаҕа – 12 900 дуоллары (730 тыһ. солк.) төлүүллэр. Оттон Украинаҕа Олимпийскай оонньуулар кыһыл көмүс мэтээллэрин иһин 110 тыһыынча 600 евроны (7 мөл. 700 тыһ. солк.) көрүллэр.
Арай Норвегияҕа, Швецияҕа, Великобританияҕа Олимпиадаҕа кыайыы иһин туох да төлөммөт эбит.
Роман Попов, “Саха сирэ” хаһыат, edersaas.ru