Куорат Думатын бэрэссэдээтэлин бастакы солбуйааччы Марина Силкина 15 №-дээх «Северные звездочки» уһуйааҥҥа сылдьан, “Биир кэлим меню” пилотнай бырайыак чэрчитинэн оҕо аһылыга хайдах тэриллибитин билистэ.
Оскуолаҕа киириэн иннинээҕи саастаах оҕо тэрилтэлэрин уһун, тымныы кыһыннаах, тыйыс айылҕалаах хоту дойдуга сөптөөх калорийы биэрэр төрүт аһынан хааччыйар «Биир кэлим меню» пилотнай бырайыак Марина Силкина көҕүлээһининэн оҥоһуллубута. Куорат дьаһалтата үбүлээһини көбүччү көрөн, 2018 сылтан уһуйааннар иитиллээччилэрин олохтоох аһынан-үөлүнэн (балыгынан, убаһа этинэн, сир аһынан, үрүҥ аһынан, оҕуруот аһынан…) аһатар буолбуттара.
Марина Силкина, куорат Думатын бэрэссэдээтэлин бастакы солбуйааччы, «Биир кэлим меню» пилотнай бырайыак ааптара:
– Пилотнай бырайыагынан бастаан куорат түөрт уһуйаана: 33 №-дээх «Теремок», 97 №-дээх «Незабудка», 15 №-дээх «Северные звездочки» уонна 104 №-дэх «Ладушка» үлэлээбиттэрэ. Билигин бары уһуйааннар киирэн эрэллэр. Сүрүн түһүмэх кулун тутарга түмүктэниэҕэ, оччотугар өссө туох наадатын, туох итэҕэһин эбэтэр туох ордук-хоһу буоларын ырытан көрүөхпүт. Санитарнай-эпидемиологическай ирдэбил урукку сылларга оскуола иннинээҕи саастаах оҕо аһылыгар олохтоох усулуобуйа уратытын учуоттаабат этэ. Холобур, тоҥоруллан баран ириэриллэр эти, ол иһигэр убаһа этин, аска туттары төрүт боборо. Оттон биһиги, хоту дойду олохтоохторо, үүппүтүн-эппитин тоҥорон эрэ харайар кыахтаах буоллахпыт. Билигин, пилотнай бырайыак чэрчитинэн, улахан үлэ ыытыллан, оҕолорбутун олохтоох аһынан-үөлүнэн аһатар кыахтанныбыт. Тыйыс айылҕалаах хоту дойду оҕото кыра сааһыттан сөптөөх калорийы биэрэр бородууксуйанан аһыахтаах уонна аһылык култууратыгар үөрэниэхтээх.
Аҕыйах сыллааҕыта үлэҕэ киллэриллибит «Северные звездочки» уһуйаан оскуолаҕа киириэн иннинээҕи саастаах оҕолору сөптөөхтүк сайыннарар усулуобуйанан толору хааччыллыбыт. Ол курдук манна дьоҕус бассейн, туус «хаспаҕа», фитобар, спортивнай, музыкальнай уонна аактабай саалалар бааллар. Оҕолору өй-санаа уонна эт-хаан өттүнэн эрчийэр, сайыннарар, үөрэтэр-иитэр араас дьаһаллары иитээччилэр анал бырагыраама быһыытынан тэрийэллэр. Аһылык блогар алта асчыт сарсыада эрдэттэн киэһэ хойукка диэри оҕолору иҥэмтиэлээх уонна тотоойу аһылыгынан күндүлүүр туһугар сыралаһан үлэлииллэр. Уһуйаан сэбиэдиссэйэ Нина Горбунова уонна ыстаарсай медсиэстэрэ Татьяна Филиппова күннээҕи менюну пилотнай бырайыакка сөп түбэһиннэрэн оҥороллор. Онон, кырачааннар эбиэккэ эттээх миини иһиллэр, гарнирдаах убаһа этин уонна саха лэппиэскэтин сииллэр, отонунан оҥоһуллубут утаҕы иһэллэр.
Раиса СИБИРЯКОВА, Саха сирэ” хаһыат, edersaas.ru
Хаартыскалар: интэриниэттэн