Киһи-аймах биир саамай сөбүлүүр, күүтэр бырааһынньыга Саҥа дьыл буолара чугаһаата.
«Улуус олоҕо» анал бырайыак чэрчитинэн, ый аайы «Барыбыт кыһалҕабыт» рубрикаҕа өрөспүүбүлүкэ бүттүүнүгэр сыһыаннаах тыҥаан турар кыһалҕалары, дьоҥҥо туһалаах тиэмэлэри быһа эфиргэ ырытыһабыт. Ол курдук, бэҕэһээ, сэтинньи 29 күнүгэр, «Сахамедиа» холдинг медиа-киинигэр «Как обезопасить себя от контрафактных фейерверков» диэн пиротехниканы туттууга сэрэхтээх буолуу туһунан онлайн-биэрии буолбута. Бүгүн ол «төгүрүк остуолга» этиллибиттэн саамай наадалааҕын тиэрдэбит.
Бастатан туран, пиротехническэй оҥоһуктары, фейерверктэри итинник табаардары атыылыыр анал маҕаһыыннартан, фирмалартан ылар ордук. Онуоха хаачыстыбаны туоһулуур сертификаты хайаан да көрдөөн көрүөхтээххит. Таарыччы — туттуллуохтаах болдьоҕун эмиэ. Инструкциятын болҕойон ааҕыҥ.
Дьиэҕэр аҕалан баран, сөрүүн, сиигэ суох сиргэ уур.
Иккиһинэн, оҕолорго пиротехниканан оонньууру көҥүллээмэҥ уонна фейервердэри ыттарымаҥ. Оҕо илиитигэр, бэл диэтэр, бенгальскай уоттар сэрэхтээхтэр.
Үсүһүнэн, холуочуйан, итирэн баран, фейерверк, салют ытар бэйэ олоҕор кутталлааҕын бары да бэркэ өйдүүр инигит. Итирдэр утах туймаардан, хамсанара бытаарбыт киһи пиротехника фитилин төлө тартым дии санаабыта, номнуо умайан эрэр буолуон сөп.
Төрдүһүнэн, аһаҕас эрэ сиргэ ытыллыахтаахтар. Дьиэлэртэн, уот боруобаттарыттан 50-100 миэтэрэ тэйиччи ыраах сиргэ. Маныаха куораттарга, улуустарга, нэһилиэктэргэ итинник анал сирдэр тэриллиэхтээхтэр. Сотору кэминэн ол аадырыстар быһаарыллыахтара, чопчуланыахтара. Дьон фейерверк ытыллар сириттэн тэйиччи туран көрүөхтээх.
Бэсиһинэн, фейерверктэри ытыах иннинэ, хаарынан, таастарынан, кирпииччэлэринэн тулалыыр ордук. Уотунан уһуурарыгар, ыһыахтанарыгар харгыс курдук буоларыгар. Сэрэххэ, уулаах иһиттэ илдьэ тахсыҥ (ол-бу буоллаҕына, тута умулларарга наада).
Алтыһынан, уматаргар төҥкөйөн турума уонна дьон диэки дьээбэлэнэн даҕаны ытыма. Дьиэ кыылларын (ыты) илдьэ тахсыма: мэһэй-таһай буолуохтара, алҕас дэҥнэниэхтэрэ даҕаны.
Сэттиһинэн, кыайан умайбатах эбэтэр болдьоҕо ааспыт маннык табаары ууга сытыарыҥ (икки чаас эбэһээт), онтон быраҕыҥ.
Ахсыһынан, ытан бүтэн баран, ол сири хомуйуҥ, илиигитин суунуҥ.
Бу судургу ирдэбиллэри тутустахха, бырааһынньык этэҥҥэ ааһыаҕа!
Биһиги корр., «Саха сирэ» хаһыат, edersaas.ru
Хаартыска: интэриниэттэн.