Алтынньы 10 – 15 күннэригэр Болгария Пловдив куоратыгар ыытыллыбыт бэтэрээннэр классическай уонна көҥүл тустууга аан дойду чөмпүйэнээттэригэр алта саха бөҕөһө кытынна.
Бу иннинэ 70 – 80-наахтар кытары күүстэрин холоспут буоллахтарына, быйылгыттан тэрийээччилэр кыттааччылар саастарын 60-нан хааччахтыырга быһаардылар. Онон көбүөр маастардара 62, 70, 78, 88, 100, 130 киилэҕэ диэри ыйааһыннарга саастарынан биэс бөлөххө наарданан туһуннулар.
Бу улахан түһүлгэҕэ Арассыыйа сүүмэрдэммит хамаандатыттан 40-45 саастаахтарга Дьокуускай куорат ДЮСШ-3 тириэньэрэ Василий Уйгуров (70 кг), Чурапчы улууһуттан спорт киинин дириэктэрэ Александр Андреев (78 кг), Тааттаттан Григорий Массаев (88 кг), 56-60 саастаахтарга Уус Алдантан Василий Шепелев (62 кг), Виктор Черкашин (62 кг) уонна Вадим Данилов (70 кг) күүстэрин холоннулар.
Хомойуох иһин, Пловдив быйылгы түһүлгэтэ саха тустууктарыгар мэтээл тосхойбото. Василий Уйгуров ыйааһыныгар бэһис, Александр Андреев –тохсус, Григорий Массаев – сэттис, Виктор Черкашин –бэһис, Василий Шепелев– тохсус, Вадим Данилов – бэһис буоллулар.
Роман Попов, «Саха сирэ» хаһыат, edersaas.ru