Бу күннэргэ Дьокуускай куоракка Россия почтатын үс отделениетыгар «Почта Баан» анал «түннүктэрэ» аһылыннылар.
Сыл бүтүөр диэри улуус кииннэригэр «Почта Баан» салаалара эмиэ аһыллыахтаахтар. Билигин өрөспүүбүлүкэ киин куоратыгар баан «түннүктэрэ» Киров уулуссатын 21В №-гэр (27 №-дээх почта), Ленин проспегын 44 №-гэр (7-с №-дээх отделение) уонна Аммосов уулуссатын 8 №-дээх дьиэтигэр үлэлииллэр. «Почта Баан» нөҥүө үлэһиттэр хамнастарын ылыахтарын сөп уонна кирэдьиит оҥорторор кыахтаннылар.
Кирэдьиит муҥутуур кыра бырыһыана 16,9%-тан 12,9%-ҥа диэри намтаата. Бу ставканан баан саҥа килийиэннэрэ, «Почта Баан» нөҥүө хамнастарын ылар дьон туһаныахтара.
500 тыһ. солк. диэри суумалаах кирэдьииты ылар дьонтон пааспар уонна СНИЛС ирдэнэр. Оттон «Уһук Илин гектар» бырайыак кыттааччыларыгар кирэдьиит бырыһыана өссө намыһах. Чэпчэтиилээх кирэдьиит бырыһыана 8,5 – 10,5% тэҥнэһэр. Сиһилии «Почта Баан» салааларын үлэһиттэриттэн билсиҥ.
Анивера АКИМОВА, «Саха сирэ» хаһыат, edersaas.ru