Атырдьах ыйын 29 күнүгэр Хаҥалас улууһун Покровскай куоратыгар “ПрофSTART-2017” үлэ дьаарбаҥкатыгар Дьыалабыай актыыбынас киинэ арылынна. Үөрүүлээх арыллыыга Саха Өрөспүүбүлүкэтин бырабыыталыстыбатын бэрэссэдээтэлин солбуйааччы Алексей Дьячковскай уонна Үлэлээх буолуу судаарыстыбаннай кэмитиэтин бэрэссэдээтэлэ Степан Москвитин кыттыыны ыллылар. Тэрээһин “Мир” рудникка өлбүт аҕыс шахтеру кэриэстээн мүнүүтэ саҥата суох турууттан саҕаланна. 
Киин үлэтэ суох, үлэ көрдөнө сылдьар дьону учуоттуур уонна кинилэргэ үлэ миэстэтэ булан биэрээһининэн дьарыктанар. Манна үлэлээх да дьон, устудьуоннар, уо.д.а. үлэ ыйытыахтарын сөп. Киин “Өктөмнөөҕү научнай – үөрэтэр киин” технопарка үлэһиттэрэ оҥорбут мобильнай приложениеларын туһаныа.
Тэрээһин чэрчитинэн Саха Өрөспүүбүлүкэтин бырабыыталыстыбатын чилиэннэрэ, Ил Түмэн дьокутааттара, Хаҥалас улууһун нэһилиэктэрин баһылыктара, бизнес холбоһуктар бэрэстэбиитэллэрэ үлэ рыногын билиҥҥи туругун быһаарыстылар.
Өрөспүүбүлүкэҕэ үлэлиир «Якутуголь», «Селигдар», «Роснефтегаз» курдук бөдөҥ хампаанньалар ыалдьыттарга видеопрезентацияларын көрдөрдүлэр. Оскуола оҕолоро исписэлиистэр консультацияларын иһиттилэр, идэлэрин сөпкө талар тест толордулар уонна “Импульс” ыччат үлэлээх буолуутун биржата тэрийбит дьылабыай оонньуутугар кытыннылар.
Алексей Дьячковскай, Саха Өрөспүүбүлүкэтин бырабыыталыстыбатын бэрэссэдээтэлин солбуйааччы:
- — Саха сирин олохтоохторо өрөспүүбүлүкэ иһигэр уонна тас өттүгэр үлэ булалларыгар туһалаах киин буолуо.
Николай Попов, «Саха сирэ» хаһыат, edersaas.ru