Олоххо ардыгар киинэтээҕэр уустук, омуннаан эппит курдук эриирдээх «сюжеттаах» быһылааннар тахсаллар. Биир оннук түбэлтэ Ленскэй оройуонугар буолбут.
Бу дьыл от ыйын 16 күнүгэр, сарсыарда 05.00 саҕана, Ленскэй полициятын дьуһуурунай чааһыгар автозаправка операторыттан тыллабыр киирбит. Витим бөһүөлэгин Луговая уулуссатыгар харах тэстэринэн айаннаан испит микрооптуобус эргииргэ кыайан салайбакка, суолтан туора көтөн, онно баар кылабыыһа күрүөтүн тоҕо түһэн баран, түҥнэстибитин туһунан.
Суол быһылаана тахсыбыт сиригэр участковай боломуочунай Рустамжон Валиев уонна оперативнай дьуһуурунай көмөлөһөөччүтэ Сергей Ярунец ойуппуттар.
Ол тиийбиттэригэр, саахалламмыт массыына буруолаан киирэн барбыт. Сибилигин умайаары дуу, эстээри дуу гыммытын сэрэйэн, полицейскайдар микрооптуобус иһигэр киирэн, өйдөрүн сүтэрбит икки киһини ороон таһаарбыттар.
Ол таһаарааттарын кытта, массыына умайан киирэн барбыт, онтон бүтүннүү уокка былдьаммыт.
Ол кэнниттэн ким-туох буолбутун быһаарыы кэмигэр биллибитинэн, уруулга урут массыынаны күрэтэн сууттана сылдьыбыт, Иркутскай уобаластан төрүттээх 22 саастаах уол олорбут эбит. Оттон кини аргыһа — Витим 42 саастаах олохтооҕо.
Маны таһынан, ити уокка былдьаммыт «Мазда Бонго Френди» микрооптуобуһу бу сордоохтор ити быһылаан эрэ иннинэ күрэппиттэрэ биллибит. Хаһаайын бөһүөлэк биир уулуссатыгар микрооптуобуһун аанын хатаабатаҕын ааһан, күлүүһүн хаалларан барбыт. Ону массыынаны күрэтэ үөрүйэх 22 саастаах уол итиригэр оҕустаран туһаммыт.
СӨ ИДьМ-тын пресс-сулууспата иһитиннэрбитинэн, хорсун полицейскайдар иккиэн ис дьыала уорганнарыгар сулууспалаабыттара уонтан тахса сыл буолбут.
Вера МАКАРОВА, «Саха сирэ» хаһыат, edersaas.ru
Хаартыска: интэриниэттэн.