Полиция оперативниктара уоруулары арыйдылар

Ааптар: 
Бөлөххө киир:

Атын киһи баайыгар-малыгар ымсыыран эрэ буолбакка, биир бытыылка арыгы иһэр туһуттан эмиэ уораллар. Полицейскайдар кэлиҥҥи икки-үс күҥҥэ ханнык уоруулары арыйдылар?

Вера МАКАРОВА, «Саха сирэ», https://edersaas.ru/

Чурапчыга. Техникумҥа үөрэнэр, каникулларыгар дойдуларыгар сынньана тахсыбыт 16 саастаах уолаттар түүн почта дьиэтин эрэһээҥкитин тоҕо тардан, аанын алдьатан киирэн, табах, зажигалка, икки бааҥка «тушенка» уорбуттар. Почта дьиэтэ туох да сигнализацията, видеокамерата суох буолан, уоруйахтар мэһэйи көрсүбэтэхтэр. «Подсобкаҕа» сейфэ булбуттарын алдьата сатаабыттар да, кыайан арыйбатахтар.

Ити уоран баран, аны аттынааҕы, ас-үөл маҕаһыына буолан турар дьиэҕэ, тахсыбыттар. Бастаан аанын алдьата сатаабыттар, ону тимир эрэһээҥки мэһэйдээн, кыайбатахтар. Ол иһин дьиэ атын өттүнэн тиийэн, түннүгүн алдьатан киирбиттэр. Манна гаастаах утахтары, сакалааттары, ыастары уорбуттар. Бу уорууну оперативниктар икки чаас иһигэр, «сылааһына» арыйбыттар.

Горнайга. Биир дьахтар баанньыгыттан 7 тыһ. солк. сыаналаах эрбиини уорбуттар. Уорбаланааччыны туппуттар — урут уорууга түбэһэн, хаста да сууттана сылдьыбыт 42 саастаах олохтоох киһи эбит. Эрбиини биир бытыылка арыгыга атастаспыт.

Ленскэйгэ уонна Уус Алдаҥҥа баан каартатыттан харчыны уорууну арыйдылар. Ленскэйгэ биир дьахтар каартатыттан 10 тыһ. солк. устубуттарын туһунан смс-иһитиннэрии кэлбитигэр, полицияҕа эрийбит. Ити күн иннинэ киниэхэ 34 саастаах урукку күтүөтэ кэлэ сылдьыбыт эбит — бу киһини уорбалаан туппуттар. Ханна да үлэлээбэт киһи дьахтар каартатын пин-кодун билэр буолан, «мобильнай баан» нөҥүө уорбут.

Оттон Уус Алдаҥҥа биэнсийэлээх дьахтар каартатыттан эмиэ «мобильнай баан» нөҥүө 24 тыһ. солк. уорбуттар. Биллибитинэн, бу дьахтар уулуссаттан такси тохтотон олорсон, суумкатын таһырдьа хаалларан кэбиспит. Ону хайа эрэ киһи булан, 31 саастаах билэр дьахтарыгар илдьэн биэрбит. Дьахтар буоллар, суумкаттан суотабай төлөпүөнү булан, ол онно баар «мобильнай баанынан» харчыны бэйэтин счетугар көһөрбүт.

Мэҥэ Хаҥаласка. Аллараа Бэстээххэ биир дьахтар дьиэтиттэн 4 тыһ. солк. сыаналаах аһын-үөлүн уорбуттар. Дьахтар быһаарбытынан, маҕаһыынтан ас атыылаһан аҕалан, дьиэтигэр ууран баран, салгыы атын наадаларынан барбыт. Уорбаланааччыны ДПС иниспиэктэрдэрэ туппуттар. Патруллуу сылдьан көрдөхтөрүнэ, биир итирик киһи маҕаһыын тэлиэскэтин сосуһа сылдьар эбит. Тохтотон ыйыппыттарын, «маҕаһыынтан уорбутум» диэн аһаҕастык билинээччи буолбут. Дьахтар били астаах суумката эмиэ онно сытар эбит.

Бу урут сууттана сылдьыбыт 37 саастаах киһи дьахтары уулуссаҕа көрөн, дьиэтигэр диэри батыһан тиийбит. Уонна дьахтар аанын хатаабакка тахсан барбытын көрөн, дьиэҕэ киирэн ылан тахсыбыт.

Ньурбаҕа. Эмиэ ас маҕаһыыныгар уоруу тахсыбыт. Ол туһунан полицияҕа маҕаһыын атыылааччыта эрийэн эппит. Уорбаланааччыны суола сойо илигинэ, «сылааһына» туппуттар: 36 саастаах итирик киһи маҕаһыыҥҥа анаан-минээн ас уора кэлбитин билиммит — 2 л «кока-кола» утаҕы уонна түргэнник буһар лапсаны уорбут. Утаҕын арыгыга атастаспыт.

Дьокуускайга. Киин куорат олохтооҕо дьахтар түүҥҥү кулуупка биир киһилиин билсэн баран, салгыы гостиницаҕа барбыттар. Дьахтар сарсыарда турбута — көмүс оҥоһуктара да мэлигир, киһитэ да суох. Уорбаланааччыны туттулар — Кыргызстантан төрүттээх, урут талааһыҥҥа түбэһэн сууттана сылдьыбыт 28 саастаах киһи.

Бу чахчыларынан «уоруу» ыстатыйанан холуобунай дьыалалар тэриллибиттэрин СӨ ИДьМ-тын пресс-сулууспата иһитиннэрдэ.

Вера МАКАРОВА, «Саха сирэ», https://edersaas.ru/

Хаартыска: интернеттэн.

+1
0
+1
0
+1
0
+1
0
+1
0
+1
0
+1
0