Вера МАКАРОВА, «Саха сирэ», https://edersaas.ru/
Саҥа дьыллааҕы бырааһынньыктааҕы түбүктэр саҕаланан, өрөспүүбүлүкэ полицейскайдара, маннык кэмҥэ буоларын курдук, сулууспаларын күүһүрдүллүбүт варианыгар көстүлэр. Бу туһунан СӨ ИДьМ-тын пресс-сулууспата иһитиннэрдэ.
Уулуссаҕа, уопсастыбаннай миэстэҕэ бэрээдэги көрүү элбээбитин таһынан, полиция үлэһиттэрэ бырааһынньыктары тэрийэр эбээһинэстээх тэрилтэлэри, дьону кытта көрсөн, бэрээдэги араҥаччылааһын, куттал суох буолуутун хааччыйыы уонна терактартан көмүскэллээх буолуу боппуруостарын быһаарыстылар.
Ураты болҕомто Ил Дархан Харыйатын тэрийиигэ уурулунна. Араас улуустартан кэлэр оскуола оҕолорун оптуобустарын ГИБДД сулууспата бары өттүттэн көрөн бэрэбиэркэлээтэ. Техническэй туруктарыттан саҕалаан, оптуобустары арыалааһыҥҥа тиийэ.
Суһал-сэрэтэр тэрээһиннэр ыытыллар кэмнэригэр, полицейскайдар дьон тоҕуоруһар сирдэрин, криминогеннай оройуоннары, омук гражданнарын, сэптээх-сэбиргэллээх уонна учуокка турар дьону ордук сытайан бэрэбиэркэлииллэр.
Уопсастыбаннай бэрээдэги көрүүгэ чааһынай харабыллыыр тэрилтэлэр үлэһиттэрэ, казачество бэрэстэбиитэллэрэ уонна норуот дружинниктара эбии көмөлтө буолаллар.
Уулуссаҕа быһыы-майгы хайдаҕын хонтуруоллуу олорорго «Куттала суох куорат» видеокамеранан суукканы супту кэтиэхтэрэ.
Бэрээдэги кэһии, буруйу оҥоруу чахчыларын көрдөххүтүнэ, 02, суотабай төлөпүөнтэн 020 нүөмэрдэргэ эрийэн биллэрэҕит.
Вера МАКАРОВА, «Саха сирэ», https://edersaas.ru/
Хаартыска: интернеттэн