close

Василий Егоров Польша рингэтигэр бастакы кыайыытын сурунна...
· - Дьулуур - Олох-дьаһах

Василий Егоров Польша рингэтигэр бастакы кыайыытын сурунна

Польша аатырбыт тириэньэрэ Феликс Штамм кэриэһигэр боксаҕа үгэс буолбут норуоттар икки ардыларынааҕы турнирга 27 дойдуттан 136 боксер күрэстэһэр. Быйылгы күрэхтэһиигэ Арассыыйа сүүмэрдэммит хамаандатыттан тоҕус спортсмен, ол иһигэр биир дойдулаахпыт, аан дойду үрүҥ көмүс призера Василий Егоров кыттар. 

Европа икки төгүллээх чөмпүйүөнэ Василий Егоров улахан кыайыыларын 49 киилэлээхтэргэ ситиспит буоллаҕына, бу аан дойдутааҕы таһымнаах күрэхтэһиигэ тириэньэрдэрэ кинини 52 киилэҕэ диэри ыйааһыҥҥа тургутан көрөргө санаммыттар. Манна даҕатан эттэххэ, соторутааҕыта Дьокуускайга ыытыллыбыт Бүтүн Арассыыйатааҕы турнирга Василий 52 киилэлээхтэргэ эрэллээхтик бастаан турар.

Бэҕэһээ, кулун тутар 12-гэр, Василий Егоров бастакы киирсиитигэр Польша эдэр спортсменын Мазиж Йозвигы 4:1 ахсаанынан хотто. Бүгүн саха боксера Германия биэс төгүллээх чөмпүйүөнэ Хамза Тубаны кытта күөн көрсүөҕэ. 27 саастаах Хамза Туба Бакуга ыытыллыбыт Европа оонньууларын боруонса призердарынан буолар, аан дойду чөмпүйэнээттэрин кыттыылааҕа. Ону сэргэ полупрофессионаллар аан дойдутааҕы серияларыгар куһаҕана суохтук кыттыбыта биллэр.

Феликс Штамм кэриэһигэр күрэхтэһии кулун тутар 16 күнүгэр түмүктэниэҕэ.

Роман Попов, “Саха сирэ” хаһыат, edersaas.ru

#бүгүн: 1
2
0

Сайт матырыйаалларын ааптар көҥүлэ суох ылар бобуллар.