2017 сыл Дьокуускай куорат үрдүнэн Үтүөнү оҥоруу сылынан биллэриллибитэ. Бу чэрчитинэн, «Прадо-95» батсаап бөлөҕүн кыттыылаахтара тулаайах оҕолору көрөр-истэр оскуолаларга, санаторийдарга, элбэх оҕолоох кыаммат ыалларга харчы хомуйан тугу эмит атыылаһан көмөлөһөргө соруннулар.
Күннэй Черноградская, «Прадо-95» ватсаап бөлөҕүн салайааччыларыттан биирдэстэрэ:
– Анал бөлөххө 154 кыттааччы баарыттан ким 500-түү, ким 1000-лыы, ким 2000-лыы солк биэрэн, барыта 75 тыһ. солк. мустубут. 154 киһиттэн аҥара кытынна. Хаҥалас улууһун I Дьөппөннөөҕү санаторий оскуола дириэктэрэ Дмитрий Сакирдоновка төлөпүөнүгэр эрийэн, тугу атыылаһан биэрэбит диэн ыйыппыппытыгар, телевизор диэбитин ыллыбыт уонна тохсунньу 13 күнүгэр илдьэн туттарыахпыт. Манан эрэ муҥурданыахпыт суоҕа. Инники өттүгэр маннык хабааннаах аһымал аахсыйалары тэрийиэхпит.
Дьэ, маладьыастар! Биллэн турар, «Прадо» массыыналаахтар итинэн эрэ бүппэтэхтэрэ буолуо. Батсаап анал бөлөҕөр 154 кыттааччы баар. Бу аахсыйаҕа кыттыан баҕалаах 89248797288 уонна 89142271005 нүөмэрдэргэ эрийэн, ити бөлөххө киириэххитин сөп. Саамай сүрүнэ, тимир көлөҕүт Прадо 90-95 кузовтаах буолуохтаах! Күн киһитэ көмүскэс, айыы киһитэ аһыныгас! Бөлөххө киирэн, аһымал аахсыйаҕа харчынан эрэ кыттыһыы буолбатах. Манна «Прадо 90-95» кузовтаах тимир көлө туһунан элбэҕи билиэххит-көрүөххүт.
Александр ТАРАСОВ, «Саха сирэ» хаһыат, edersaas.ru