Праймериз: биир күн иһигэр хандьыдаат ахсаана икки төгүл элбээтэ

Ааптар: 
Бөлөххө киир:

Муус устар 6 күнүгэр “Биир ньыгыл Арассыыйа” баартыйа барыллаан куоластааһынын тэрийэн ыытар кэмитиэт уочараттаах мунньаҕа буолла. Онно “Дьокуускай куорат” куораттааҕы уокурук баһылыгын быыбарын иннинэ “ньыгыллар” ыытар праймеризтарыгар кыттыан баҕалаах үс киһи сайабылыанньатын көрдүлэр.

Роман ПОПОВ, «Саха сирэ» хаһыат, edersaas.ru


Тэрийэр кэмитиэт дьүүллэһии кэнниттэн биллиилээх айанньыт, теле-биэриилэри ыытааччы Андрей И (Хорошевы), “Биир ньыгыл Арассыыйа Эдэр Гвардията” тэрилтэ уопсастыбаннай сэбиэтин чилиэнэ Святослав Софронеевы уонна СӨ Ил Дарханын иһинэн урбааҥҥа сүрүннүүр сэбиэт чилиэнэ, Уопсастыбаннай палаата чилиэнэ Ирина Высокиҕы барыллаан куоластааһын кыттыылаахтарынан регистрациялаата.

Онон муус устар 6 күнүнээҕи туругунан, “Дьокуускай куорат” куораттааҕы уокурук баһылыгын быыбарын барыллаан куоластааһыныгар билиҥҥитэ алта хандьыдаат кыттарга оҥостор: киин куорат баһылыга Айсен Николаев, урбаанньыт Николай Потапов, юрист Олег Яхонтов, теле-биэриилэри ыытааччы Андрей И (Хорошев), эдэр гвардеец Святослав Софронеев уонна урбаанньыт Ирина Высоких.

Санатар буоллахха,  “Дьокуускай куорат” куораттааҕы уокурук баһылыгын дуоһунаһыгар барыллаан куоластааһыҥҥа кыттыан баҕалаахтартан сайабылыанньаны ылыы муус устар 27 күнүн киллэрэн туран ыытыллар.

— Барыллаан куоластааһын — дьоһун, норуот итэҕэйэр дьонун сүүмэрдиир, суолталаах түһүмэх, — диэтэ Судаарыстыбаннай Дуума дьокутаата Галина Данчикова. Итиэннэ дьон маннык куоластааһыҥҥа итэҕэйэрэ баартыйа көдьүүстээх үлэтин кэрэһилиирин бэлиэтээтэ.

Дьокуускай куорат баһылыгын быыбарыгар “Биир ньыгыл Арассыыйа” баартыйа хандьыдаатын быһаарар барыллаан куоластааһын ыам ыйын 28 күнүгэр буолар.

Роман Попов, «Саха сирэ» хаһыат, edersaas.ru

+1
0
+1
0
+1
0
+1
0
+1
0
+1
0
+1
0