Праймериз: хандьыдааттар кимнээхтэрэ билиннэ

Ааптар: 
Бөлөххө киир:

“Биир ньыгыл Арассыыйа” баартыйа муус устар 9 күнүгэр олохтоох салыйыныы быыбарданар дуоһунастарыгар барыллаан куоластааһыны ыытан хандьыдааттарын тургутан көрүө.

Роман Попов, “Саха сирэ” хаһыат, edersaas.ru

Кулун тутар 31 күнүгэр муниципальнай тэриллиилэр быыбардарыгар “Биир ньыгыл Арассыыйа” баартыйаттан кыттыан баҕалаахтартан сайабылыанньалары тутуу түмүктэннэ, мантан антах тэрийэр кэмитиэттэр биэс хонук иһигэр барыллаан куоластааһын кыттыылаахтарын регистрациялыахтара.

Саха сирин “ньыгыллара” олохтоох салайыныы бары быыбарданар дуоһунастарыгар кыттарга ох курдук оҥостоллор, бу күннэргэ бэйэлэрин хандьыдааттарын барыллаан куоластааһын нөҥүө тургутан көрөргө бэлэмнэнэллэр.

Улуус баһылыгын дуоһунаһыгар барыллаан куоластааһыҥҥа кыттарга сайабылыанньаларын биэрдилэр: Үөһээ Бүлүү улууһа – Владимир ПОСКАЧИН, Семен МИХАЛЕВ; Дьааҥы – Гаврил ЧИРИКОВ, Сергей СИВЦЕВ, Александр РОЖИН; Бүлүү – Евгений КАПИТОНОВ, Василий ЛУКИН; Мэҥэ Хаҥалас – Яков ДМИТРИЕВ, Василий ПЕТРОВ, Николай СТАРОСТИН; Ньурба – Алексей ИННОКЕНТЬЕВ, Леонид КИМ, Аким КАНАЕВ, Николай ФОМИН; Өймөкөөн – Михаил ЗАХАРОВ, Владимир КОГОЛЬ; Орто Халыма – Евгений СЛЕПЦОВ, Василий СЛЕПЦОВ; Томпо – Яков СТЕПАНОВ, Иван ПАВЛОВ, Клим СЫРОМЯТНИКОВ.

Нэһилиэк баһылыгын 214 мандаатыгар — 505, оройуон дьокутаатын 111 мандаатыгар — 174, нэһилиэк дьокутаатын 2 926 мандаатыгар 3 538 сайабылыанньа киирдэ.

Муус устар 9 күнүгэр өрөспүүбүлүкэҕэ олохтоох бириэмэнэн сарсыарда 8:00 чаастан киэһэ 20:00 чааска диэри счетнай учаастактар үлэлиэхтэрэ. Куоластааһыҥҥа быыбардыыр бырааптаах, туһааннаах уокурукка  бастайааннай пропискалаах Арассыыйа Федерациятын гражданнара кытталлара көҥүл.

Куоластааһын рейтининэн ыытыллар. Ол эбэтэр быыбардааччы бүлүтүөҥҥэ киллэриллибит хас да хандьыдаакка куолаһын биэриэн сөп.

Оттон “Дьокуускай куорат” куораттааҕы уокурук баһылыгын дуоһунаһыгар барыллаан куоластааһыҥҥа кыттыан баҕалаахтартан сайабылыанньаны ылыы муус устар 27 күнүн киллэрэн туран ыытыллар.

Муус устар 4 күнүнээҕи туругунан, мээр дуоһунаһыгар Дьокуускай баһылыга Айсен НИКОЛАЕВ, эдэр урбаанньыт Николай ПОТАПОВ уонна юрист Олег ЯХОНТОВ регистрацияланнылар.

Кинилэртэн хайалара “Биир ньыгыл Арассыыйа” баартыйа аатыттан киин куорат баһылыгын дуоһунаһын быыбарыгар кыттыаҕын ыам ыйын 28 күнүгэр билиэхпит.

Роман Попов, “Саха сирэ” хаһыат, edersaas.ru

+1
0
+1
0
+1
0
+1
0
+1
0
+1
0
+1
0