Бу боппуруоска эппиэти муус устар 9 күнүгэр ыытыллар “Биир ньыгыл Арассыыйа” баартыйа барыллаан куоластааһынын түмүгэ таҕыстаҕына биирдэ билиэхпит.
Роман Попов, “Саха сирэ” хаһыат, https://edersaas.ru
Ити күн “ньыгыллар” барыллаан куоластааһыны (праймериһы) ыытан, улуус, оройуон киинин, нэһилиэк баһылыктарын, олохтоох бэрэстэбиитэллээх уорганнар дьокутааттарын быыбарыгар кыттар хандьыдааттарын сүүмэрдиэхтэрэ. Дойду биир бөдөҥ баартыйатын аатыттан ким ханнык дуоһунаска дураһыйарын, дьэ, эрэдьиэстиэҕиҥ эрэ.
Улуус баһылыгар
Томпоҕо Арктика дьыалаларыгар кэмитиэт бэрэссэдээтэлин солбуйааччы Иван Павлов уонна Байаҕантай нэһилиэгин баһылыга Яков Степанов, Бүлүүгэ киин куорат Пенсияҕа пуондатын начаалынньыгын солбуйааччы Евгений Капитонов, Дьааҥыга “Арктика суоллара” ААУо дириэктэрин солбуйааччы Сергей Сивцев уонна ОДьУоКХ салаатын кылаабынай энергетига Гаврил Чириков, Мэҥэ Хаҥаласка баһылык Николай Старостин, Ньурбаҕа улуус киинин баһылыга Алексей Иннокентьев улуус баһылыгын быыбарыгар “ньыгыллар” былаахтарынан кыттар баҕалаахтар.
Улуус кииннэригэр, нэһилиэктэргэ
Куораттарга, улуус кииннэригэр ыытыллыбыт хандьыдаакка хандьыдааттар праймеризтарын түмүктэрэ эмиэ болҕомто киинигэр турдулар. Нерюнгри баһылыга Леонид Олейник быйыл быыбарга эмиэ кыттар бигэ санаалаах. Мирнэйгэ куорат баһылыгын эбээһинэһин толорооччу Клим Антонов, Ленскэйгэ улуус баһылыгын солбуйааччы Анатолий Макушев куорат баһылыгын быыбарын иннинэ рейтиннэрин тургутунан көрүөхтэрэ. Аллараа Бэстээх баһылыгын быыбарын праймериһыгар Мэҥэ Хаҥалас улууһун баһылыгын солбуйааччы Юрий Колмаков кыттыаҕа.
Оттон Амма нэһилиэгин баһылыгын барыллаан куоластааһыныгар баһылыгы солбуйааччы Сергей Соломонов биллиилээх мадьыны Анатолий Баишевтыын туруулаһыаҕа.
Соҕотох, ол аата күүстээх
Оттон “Дьокуускай куорат” куораттааҕы уокурук баһылыга Айсен Николаевка праймеризка дьоһун утарсыыны оҥоруох хандьыдаат билиҥҥитэ көстө илик.
Барыллаан куоластааһыҥҥа кыттыан баҕалаахтартан докумуоннары кулун тутар 30 күнүгэр диэри ылаллар.
Роман Попов, “Саха сирэ” хаһыат, https://edersaas.ru