close
Президент быыбарыгар илии баттааһынын хомуйаллар...
Бэлиитикэ - Олох-дьаһах

Президент быыбарыгар илии баттааһынын хомуйаллар

Бу нэдиэлэнэн президент быыбарыгар кыттар кандидаттар докумуоннарын туттарар болдьохторо бүтэр. Билигин аны бэйэ кандидатуратын туруоруммут уонна парламеҥҥа миэстэтэ суох партиялартан кыттар дьон илии баттааһынын хомуйар аакка түстүлэр.

Санатан эттэххэ, бэйэлэрин баҕаларынан кыттар кандидаттар 300 тыһыынчаттан итэҕэһэ суох куолаһы ылыахтаахтар (биир регионтан 7,5 тыһ. куолаһы ылар көҥүллэнэр). Оттон партиялаахтар 100 тыһыынча илии баттааһынын хомуйуохтаахтар.
Владимир Путин ыстааба илии баттааһынын хомуйууну тохсунньу 5 күнүттэн саҕалаабыта. Саха сиригэр иллэрээ күнтэн саҕаланан, билигин Дьокуускайга “Туймаада”, “Айсберг”, “Проспект” атыы-эргиэн дьиэлэригэр, “Дьокуускай” аэропортка анал миэстэлэргэ хомуйа тураллар. Ону сэргэ маннык пууннары Майаҕа, Покровскайга, Нерюнгрига, Алдаҥҥа уонна Ленскэйгэ астылар.
Кинини сэргэ Саха сиригэр “Партия роста” лидерэ Борис Титов илии баттааһынын хомуйуоҕун иһитиннэрбитэ. Атын партиялар эмиэ бу нэдиэлэттэн саҕалаан хамсаныахтара. Илии баттааһынын тохсунньу 31 күнүгэр диэри ыытыахтара. Быыбар киин хамыыһыйата уонча хонук иһигэр барытын бэрэбиэркэлээн, олунньу 10 күнүгэр диэри бүтэһиктээх испииһэги таһаарыаҕа.
Билигин ЛДПР-тан киирсэр Владимир Жириновскай эрэ регистрацияланан турар. Кини уонна КПРФ-тан кыттар Ленин аатынан сопхуос салайааччыта, бизнесмен Павел Грудинин, парламеҥҥа партиялара миэстэлээх буолан, илии баттааһынын хомуйууттан босхолоноллор.

Аграфена КУЗЬМИНА, “Саха сирэ” хаһыат, edersaas.ru.

#бүгүн: 1
0
0

Сайт матырыйаалларын ааптар көҥүлэ суох ылар бобуллар.


Notice: Undefined index: comment_notes_before in /var/www/edersaas/wp-includes/comment-template.php on line 2334

18 − шестнадцать =